Kvant model energiya prognozini yaxshiladi ⚡️

Oktyabr oyining boshida Silicon Quantum Computing (SQC) hamda Schneider Electric kompaniyalari energetika sohasidagi hamkorlikning dastlabki natijalari haqida ma'lumot berishdi. Ularning taqdim etgan ma'lumotlariga ko'ra, maxsus ishlab chiqilgan gibrid kvant-klassik yondashuv energiya iste'moli prognozlarini tuzishda an'anaviy usullarga nisbatan yuqori natija ko'rsatgan. Xususan, prognoz aniqligi o'rtacha 20 foizga yaxshilangan bo'lsa, ayrim alohida holatlarda bu ko'rsatkich 41 foizni tashkil etgan.

Tajriba davomida kompaniyalar SQC Watermelon tizimidan kvant belgilari generatori sifatida foydalanishgan. Ushbu tizim orqali olingan ma'lumotlar Schneider Electric modellarining odatiy belgilari bilan birlashtirildi. Sinov jarayoni bir yil davomidagi ma'lumotlar asosida ertangi kun uchun energiya iste'molini oldindan bashorat qilish doirasida amalga oshirildi. Biroq, tomonlar to'liq metodika va metrikalarni oshkor qilmagani sababli, bu natijalar faqat o'tkazilgan tajriba doirasidagi ustunlikni ko'rsatadi.

Muvaffaqiyatli sinovlardan so'ng loyiha Avstraliyaning Critical Technologies Challenge Program dasturining ikkinchi bosqichiga yo'l oldi. Avstraliya hukumati mazkur tashabbusni davom ettirish uchun SQC kompaniyasiga 3,6 million Avstraliya dollari miqdorida mablag' ajratdi. Ushbu bosqichda sheriklar o'z modellarini yuzlab avstraliyalik xonadonlar ma'lumotlari asosida sinovdan o'tkazishni va uni sun'iy intellekt jarayonlariga integratsiya qilishni rejalashtirmoqda.

Watermelon tizimi klassik mashinali o'qitish algoritmlari uchun mo'ljallangan bo'lib, an'anaviy modellarning o'rnini egallamaydi. Kvant protsessori faqatgina qo'shimcha belgilarni shakllantiradi. Kelgusida mazkur yondashuv quyosh panellari, akkumulyatorlar va elektromobillar ko'payib borayotgan sharoitda taqsimlangan energiya resurslarini boshqarishda qo'llanilishi ko'zda tutilgan.