NVIDIA 60 ming dollarlik grant e'lon qildi 🎓

NVIDIA kompaniyasi tezkor hisoblash texnologiyalarini rivojlantirishga qaratilgan tadqiqotlar uchun Graduate Fellowship stipendiya dasturini e'lon qildi. Ushbu nufuzli dastur doirasida har bir tanlangan doktorantga 60 ming dollargacha moliyaviy yordam ko'rsatiladi. Dastur qatnashchilari NVIDIA tadqiqotchilari bilan yaqindan hamkorlik qilishadi va mukofot yili boshlanishidan oldin kompaniya ofislarida majburiy yozgi amaliyotni o'tab chiqishlari lozim bo'ladi.

Dasturda qatnashish uchun talabgorlar bir qator talablarga javob berishi kerak. Xususan, talabalar doktorantura bosqichining birinchi yilini muvaffaqiyatli tamomlagan bo'lishi, kompyuter fanlari, elektrotexnika, tizim arxitekturasi yoki shunga o'xshash sohalarda tahsil olishi va dissertatsiya doirasida faol ravishda ilmiy izlanishlar olib borishi talab etiladi. Shuningdek, stipendiya davri davomida to'liq stavkada o'qishni davom ettirish va o'quv yili tugagunga qadar o'qishni yakunlab yubormaslik shart. Kompaniya xodimlari va ularning yaqin qarindoshlari ushbu tanlovda qatnasha olmaydi, mukofot mablag'lari esa to'g'ridan-to'g'ri talabaning universitetiga o'tkazib beriladi.

Amaliyot o'tash joylari sifatida AQSh, Kanada, Germaniya, Shvetsiya, Finlyandiya, Shveytsariya, Isroil, Tayvan va Singapur davlatlari belgilangan. Xalqaro miqyosdagi doktorantlar ham ushbu tanlovda ishtirok etish huquqiga ega. Tadqiqot yo'nalishlari sun'iy intellekt, til modellari, avtonom transport vositalari, kompyuter grafikasi, kvant hisoblashlar, kiberxavfsizlik va robototexnika kabi ko'plab zamonaviy sohalarni o'z ichiga oladi.

2027–2028-yilgi mavsum uchun arizalar 2026-yil 30-sentabrda ochiladi va tavsiyanomalarni o'z ichiga olgan holda 2026-yil 30-oktabrda yopiladi. G'olib bo'lgan nomzodlar 2027-yil 15-yanvarda e'lon qilinadi. Baholash jarayonida talabaning akademik ko'rsatkichlari, tavsiyannomalar, ilmiy natijalar, tadqiqot taklifining sifati hamda uning NVIDIA kompaniyasining asosiy yo'nalishlariga qanchalik mos kelishi muhim ahamiyat kasb etadi.