RTX 4090 4005 MHz chastotaga chiqarildi 🚀

Mashhur overclocker Splave o‘zining navbatdagi yirik yutug‘iga erishib, ASUS ROG Matrix RTX 4090 video-kartasining chastotasini naq 4005 MHz ko‘rsatkichiga olib chiqdi. Bu orqali u avvalroq mazkur sohada yetakchilikni qo‘lga kiritib, 4 GHz chegarasini zabt etgan boshqa bir mutaxassis Cens natijasini ortda qoldirdi va yangi marraga erishdi.

Ushbu rekord hali ommaviy savdoga chiqarilmagan ASUS ROG Matrix RTX 4090 modeli yordamida bajarildi. Ushbu grafik karta o‘zida suyuq sovutish tizimini jamlaganiga qaramay, mazkur natijani qayd etish uchun suyuq azotdan foydalanishga to‘g‘ri keldi. Shubhasiz, oddiy xaridorlar ushbu videokartani do‘konlardan xarid qilganda bunday ulkan tezliklarga erisha olishmaydi. Biroq yangi qurilma odatdagidan ancha yuqori chastotalarda ishlay olishi kutilmoqda.

Rekord darajadagi chastotani sinovdan o‘tkazish jarayonida GPUPI dasturidan foydalanildi. Ushbu dastur odatda yuqori chastotalarga erishish imkonini berishi bilan ajralib turadi. Shu sababli, kelajakda boshqa ishqibozlar ushbu video-kartani yanada talabchan bo‘lgan 3D ilovalarda 4000 MHz tezlikka olib chiqishini biroz kutishga to‘g‘ri keladi.

Bunday g‘ayrioddiy tezliklarni ta'minlash uchun RTX 4090 grafikasiga quvvati 1000 vattdan yuqori bo‘lgan elektr manbai zarur bo‘ladi. Garchi mazkur sinov paytida kartaning aniq quvvat iste'moli oshkor etilmagan bo‘lsa-da, o‘xshash sinovlardan birida Colorful iGame videokartasi 3.975 GHz chegarasidan o‘tish uchun 1.1 kilovatt quvvat talab qilgani ma'lum. Demak, bu oddiy foydalanuvchilar qo‘li yetmaydigan, hatto suyuq azot idishi bilan qurollangan taqdirda ham o‘ta murakkab bo‘lgan ekstremal darajadagi overclock hisoblanadi.