Windows 11 majburiy yangilanmoqda 🖥

Microsoft kompaniyasi hali ham so‘nggi versiyaga o‘tmagan barcha Windows 11 kompyuterlarini 23H2 talqiniga majburiy tarzda yangilash jarayonini boshladi. Ushbu amaliyot korxona uchun yangilik bo‘lmasa-da, Redmond shahridagi dasturchilar barcha mos qurilmalarni qisqa fursatda eng so‘nggi talqinga o‘tkazish vaqti keldi deb qaror qildilar. Kompaniyaning rasmiy bayonotiga ko‘ra, Windows 11 2023 Update nomi bilan tanilgan ushbu versiya tarqatish bosqichiga kirdi va talabga javob beradigan barcha qurilmalarda avtomatik o‘rnatila boshlandi.

Mazkur qarorning ijobiy tomonlari ham mavjud bo‘lib, barcha tizimlarni bitta versiyaga keltirish xavfsizlik darajasini oshiradi hamda dasturiy ta'minot mosligini ta'minlashni osonlashtiradi. Biroq bu jarayon ikki muhim jihatni yuzaga chiqaradi. Birinchidan, bu axloqiy masala bo‘lib, foydalanuvchilar o‘z shaxsiy kompyuterlarini boshqarish huquqidan mahrum bo‘lmoqdalar. Ikkinchidan, texnik jihatdan har qanday yangi yangilanish avval muammosiz ishlab turgan tizimlarda nosozliklar keltirib chiqarishi ehtimoli yo‘q emas.

Yangilanish foydalanuvchining roziligidan qat'iy nazar o‘rnatilishi sababli, muhim ma'lumotlarning zaxira nusxasini oldindan yaratib qo‘yish tavsiya etiladi. Agar yangilanish operatsion tizimning ishlashida jiddiy muammolar tug‘dirsa va hatto uning ishga tushishiga to‘sqinlik qilsa, tizimni qayta o‘rnatishga to‘g‘ri kelganda ham barcha fayllar xavfsiz va foydalanish uchun qulay holatda qoladi.