Samsung Galaxy F15 5G Geekbench'da 📱

Samsung kompaniyasi Hindistonda o'tgan yilning dekabr oyida Galaxy A15 5G modelini taqdim etgan edi. Endilikda esa Galaxy F15 5G smartfoni Geekbench sinov dasturidan o'tib, uning ayrim texnik xususiyatlari oshkor bo'ldi.

Taqdim etilgan ma'lumotlarga ko'ra, smartfon protsessor chastotasidan kelib chiqib, A15 5G modeli bilan bir xil bo'lgan MediaTek Dimensity 6100+ chipi bilan jihozlanishi kutilmoqda. Ushbu 6 nanometrli protsessor ikkita 2.2 gigagersli Cortex-A76 va oltita 2.0 gigagersli Cortex-A55 yadrolarini hamda Mali-G57 MC2 grafik protsessorini o'z ichiga oladi. Shuningdek, sinov ro'yxatida qurilma One UI 6.0 interfeysiga asoslangan Android 14 operatsion tizimi va 4 GB tezkor xotira bilan ishlashi ko'rsatilgan.

Ma'lumot uchun, Galaxy A15 5G modeli 8 GB gacha tezkor xotiraga ega edi. Shu sababli, F15 5G uchun ham kelgusida 6 GB va 8 GB hajmli variantlar taqdim etilishi taxmin qilinmoqda. Yangi smartfonning ekran va kamera imkoniyatlari A15 5G modeliga o'xshash bo'lishi kutilmoqda. Xususan, qurilma 90 gerts yanglanish chastotasiga ega 6.5 dyuymli FHD+ Infinity-U Super AMOLED displeyi, 50 megapiksellik asosiy kamerali uchlik orqa kamera bloki va yon qismiga o'rnatilgan barmoq izi skaneri bilan jihozlanishi mumkin.

Shu hafta boshida tarqalgan render suratlari Galaxy F15 5G yanada yumaloq dizaynga ega bo'lishini va qora, binafsha hamda yalpiz ranglarda chiqarilishini ko'rsatdi. Shuningdek, smartfon A15 5G modelidagi 5000 mA/soatlik akkumulyatordan farqli ravishda, 6000 mA/soat sig'imli batareya va 25 vattli tezkor quvvatlash texnologiyasini qo'llab-quvvatlashi aytilmoqda.

Hozirgi vaqtda Samsung Galaxy F15 5G modeli Hindistonning BIS sertifikatidan o'tgani va mamlakatdagi qo'llab-quvvatlash sahifasida paydo bo'lgani bois, uning rasmiy taqdimoti yaqin kunlarda bo'lib o'tishi kutilmoqda.