Microsoft nima uchun Surface kompyuterlarida AMD ishlatmayapti? 💻

Microsoft kompaniyasining 2026-yilgi Surface qurilmalari katalogida Intel va Qualcomm protsessorlari oʻrin olgan boʻlib, yaqin kelajakda unga NVIDIA yechimlarini ham qoʻshish rejalashtirilmoqda. Biroq ushbu qatorda AMD chiplari kuzatilmayapti, holbuki bu ishlab chiqaruvchi avvalroq Surface Laptop seriyasining ikki avlodida Microsoft bilan hamkorlik qilgan edi. AMD'ning ushbu turkumdagi ishtiroki 2019-yilda Surface Laptop 3 modeli bilan boshlangan boʻlib, u ham Intel, ham AMD protsessorlari bilan chiqqan birinchi qurilma boʻlgan. Xuddi shunday yondashuv Surface Laptop 4 da ham saqlanib qolgandi, biroq 2021-yilda chiqqan Surface Laptop 5 dan boshlab Microsoft bu konfiguratsiyalardan voz kechdi va oʻshandan beri Ryzen protsessorlarini oʻz kompyuterlariga kiritmay kelmoqda.

Windows Central nashriga bergan intervyusida Surface boʻlimining korporativ vitse-prezidenti Brett Ostrum Microsoft AMD bilan hamkorlikni yuqori baholashini, biroq oʻz qurilmalari uchun butlovchi qismlarni juda ehtiyotkorlik bilan tanlashga majbur ekanini taʼkidladi. Rahbarning soʻzlariga koʻra, AMD protsessorlarining yetishmasligi asosan Surface katalogining cheklangan hajmi bilan bogʻliq. Qiziq jihati shundaki, Microsoft Xbox konsollarini ishlab chiqarishda hamon AMD chiplaridan faol foydalanmoqda va kelgusi avlod konsoli uchun ham aynan ushbu ishlab chiqaruvchini tanlagan.

Shuningdek, 2025-yilda Sound Wave kod nomiga ega boʻlgan va Arm arxitekturasiga asoslangan AMD chipi bilan jihozlangan boʻlishi mumkin boʻlgan Surface qurilmasi haqida mish-mishlar tarqalgan edi. Ushbu protsessor 2026-yilda bozorga chiqishi taxmin qilingan boʻlsa-da, hozirgacha undan foydalanadigan rasmiy mahsulotlar taqdim etilmadi. Natijada loyiha bekor qilingormi, kechiktirildimi yoki kelgusi bosqichga moʻljallanganmi, hozircha nomaʼlumligicha qolmoqda. Hozirgi vaqtda Microsoft uchun yagona rasmiy izoh – kompaniyaning ixcham portfelga egaligi va qaysi apparat platformalarini tanlashni diqqat bilan belgilashi zarurligidir.