Helldivers 2 million nusxada sotildi 🎮

Shvedlarning Arrowhead studiyasi tomonidan ishlab chiqilgan Helldivers 2 ilmiy-fantastik kooperativ shuteri butun dunyo bo'ylab geymerlar e'tiborini qozonishda davom etmoqda. Avvalroq PlayStation o'yinlari orasida God of War yetakchi bo'lgan bo'lsa, endilikda Helldivers 2 Steam platformasida bir vaqtning o'zida 155 mingga yaqin foydalanuvchini yig'ib, shunga o'xshash mustaqil loyihalar tarixida mutlaq rekord qayd etdi. Techradar nashrining xabar berishicha, bunday natija ijodkorlarning o'zini ham quvontirgan.

Arrowhead bosh direktori va loyihaning ijodiy rahbari Yoxan Pilestedt o'zining ijtimoiy tarmoqdagi sahifasida o'yinning sotuv ko'rsatkichlari haqida ma'lumot berdi. Unga ko'ra, bugungi kunda loyihaning 1 millionga yaqin nusxasi sotilgan bo'lib, ular Shaxsiy kompyuter va PlayStation 5 konsoli egalari o'rtasida deyarli teng taqsimlangan. Pilestedt boshqa mashhur loyiha – Palworld muvaffaqiyati haqida fikr bildirar ekan, agar ularning o'yini o'sha mashhurlikning yarmiga erishsa ham o'zini baxtli his qilishini ta'kidladi.

Intervyuda o'yin ichidagi savdo siyosatiga ham alohida e'tibor qaratildi. Pilestedtning fikricha, monetizatsiya huquqini ishlab topish kerak va hech kim qo'shimcha kontent sotib olishga majburlanmaydi. Moliyaviy cheklovlar tufayli tayyor loyihadan olib tashlangan ba'zi xususiyatlar, jumladan, tungi ko'rish rejimi va masofa o'lchagichga ega dubulg'alar haqida ham so'z bordi. Shuningdek, kelgusida yirik kooperativ reydlarni qo'shish imkoniyati ham istisno qilinmaydi.

Hozirgi vaqtda jamoaning asosiy e'tibori o'yinchilarni qidirishdagi muammolarni hal qilish va serverlar barqarorligini ta'minlashga qaratilgan. Ushbu texnik qiyinchiliklar bartaraf etilgach, ijodkorlar kelgusi yangilanishlar va kontent rejasini taqdim etishni rejalashtirmoqda.