MetaMask'da xavfsizlik hodisasi va validatorlar chiqishi 🚨

MetaMask jamoasi o'z infratuzilmasiga ta'sir ko'rsatgan xavfsizlik hodisasiga qarshi shoshilinch choralar ko'rilayotganini ma'lum qildi. Hozirgi bosqichda foydalanuvchilarning hamyonlariga bevosita xavf tahdid solayotgani aniqlanmagan. Hodisaning texnik tafsilotlari, zarba ostida qolgan validatorlarning aniq soni hamda yo'qotilgan efirlar miqdori hozircha oshkor etilmagani xabar qilindi.

Mazkur holat yuzasidan xavfsizlik bo'yicha maslahatchilar bilan birgalikda surishtiruv ishlari olib borilmoqda va yuzaga kelgan oqibatlar bartaraf etilmoqda. Qo'shimcha ehtiyot chorasi sifatida dasturchilar nekostodial staking jarayonlaridan validatorlarni bosqichma-bosqich chiqarishni boshladi. Shu bilan birga, kompaniya mijozlar tomonidan staking qilingan mablag'larni yechib olish kalitlarini saqlamasligi va nazorat qilmasligi ta'kidlandi.

Mazkur operatsiyalar avvalroq Consensys Staking nomi bilan tanilgan MetaMask Staking xizmatiga daxldordir. Sentyabr oyida Consensys Software o'z faoliyatini MetaMask brendi ostida yuritish istagida ekanini ma'lum qilib, biznesni ikkita alohida sohaga bo'lish jarayonini boshlagandi. Blokcheyn tadqiqotchisi Kaden.eth taxminlariga ko'ra, jarayon doirasida 523 000 ga yaqin efirni nazorat qiluvchi 17 mingga yaqin validator chiqarib yuborilgan bo'lishi mumkin.

Lido dasturchilari ushlab turilgan mablag'lar xavf ostida emasligini va mablag'lar protokollarga asta-sekin qaytishini bildirdi. Efir tarmog'idagi navbatlar tufayli butun sikl 45 kungacha cho'zilishi mumkin. Shuningdek, stETH egalari hech qanday qo'shimcha harakat amalga oshirishi talab etilmasligi tushuntirildi. Validatorlar tarmoqdan uzilishi sababli mukofotlar yo'qolishi yoki jarimalar kelib chiqish xavfini kamaytirish uchun Lido o'zining zaxira fondi va desentralizatsiyalashgan tuzilmasidan foydalanishini bildirdi.