Yevropa regulyatorlari Binance'ni tekshirmoqda 🇪🇺

Yevropa regulyatorlari dunyodagi yirik kriptovalyuta birjalaridan biri bo‘lgan Binance faoliyatini jiddiy tekshiruvdan o‘tkazmoqda. Financial Times nashrining xabar berishicha, gap kompaniyaning Yevropa Ittifoqida qonuniy istisnodan foydalangan holda o‘z faoliyatini saqlab qolgani haqida ketmoqda.

Yevropa Ittifoqining MiCA qoidalariga muvofiq, litsenziyaga ega bo‘lmagan barcha kriptovalyuta kompaniyalari joriy yilning 1-iyulidan boshlab Yevropadagi faoliyatini bosqichma-bosqich to‘xtatish choralarini ko‘rishi shart edi. Biroq, manbalarning ma’lumotlariga ko‘ra, Yevropa qimmatli qog‘ozlar va bozorlar boshqarmasi (ESMA), shuningdek Fransiya, Germaniya va Gretsiya regulyatorlari Binance tomonidan “teskari so‘rov” deb nomlanuvchi amaliyot qo‘llanilishini o‘rganishga kirishgan.

Mazkur qonuniy istisno Yevropa Ittifoqidan tashqarida joylashgan kompaniyalarga, agar mijozlar moliyaviy xizmatlarni faqat o‘z xohishiga ko‘ra talab qilsagina, EU mijozlariga xizmat ko‘rsatish huquqini beradi. Regulyatorlar birjadan tegishli ma’lumotlarni talab qilgan va agar javoblar ularni qoniqtirmasa, jarima kabi jazo choralarini qo‘llashi mumkinligi aytilmoqda.

ESMA vakillari ushbu istisno juda tor doirada tushunilishi kerakligini va undan MiCA talablarini chetlab o‘tish uchun foydalanib bo‘lmasligini ta’kidladi. O‘z navbatida, Binance kompaniyasi o‘z faoliyatida barcha amaldagi qoidalariga rioya qilishini, mahsulotlari doimiy ravishda tegishli majburiyatlarga moslashtirilishini hamda MiCA litsenziyasini olish ustida faol ish olib borayotganini ma’lum qildi.