Pixel 10 uchun GPU drayverlari yangilanadi 📱

Google kompaniyasi Pixel 10 smartfonlar seriyasida o'yinlar va grafikalar bilan bog'liq muammolarni bartaraf etish maqsadida muntazam ravishda GPU drayverlarini yangilab borishini ma'lum qildi. Avvalroq foydalanuvchilar yuqori unumdorlik talab qiluvchi o'yinlarda qotish va muzlash holatlari kuzatilayotganidan shikoyat qilishgan edi.

Android Authority nashriga bergan bayonotida Google oylik va choraklik tizim yangilanishlari grafika imkoniyatlarini yaxshilashda davom etishini tasdiqladi. Sentyabr va oktyabr oylaridagi patchlarda ham grafik drayver yaxshilanishlari o'rin olgani, shuningdek, kelgusida qo'shimcha yangilanishlar rejalashtirilgani aytib o'tildi.

Pixel 10 seriyasida TSMC tomonidan ishlab chiqarilgan Tensor G5 chipiga o'tilishi qizish muammosini kamaytirgan bo'lsa-da, umumiy unumdorlik o'sishi sezilarli darajada emas. Ushbu chip Imagination Technologies kompaniyasining PowerVR grafik protsessoridan foydalanadi.

Mutaxassislar va foydalanuvchilarning fikricha, smartfonda eski versiyadagi drayverlar ishlatilayotgani uning imkoniyatlarini cheklamoqda. Xususan, qurilma Android 16 tizimini qo'llab-quvvatlamaydigan 24.3-versiyadagi drayver bilan chiqarilgan.

Garchi ishlab chiqaruvchilar yangiroq versiyalarni taqdim etgan bo'lsa-da, Google ularni hali joriy etgani yo'q. Kompaniya yangi drayverlarning aniq chiqish muddatini ma'lum qilmadi, shu bois foydalanuvchilar muhim o'zgarishlarni biroz kutishiga to'g'ri keladi.