Marvel's Wolverine emulator orqali ishga tushirildi 🎮

Insomniac Games studiyasining Marvel's Wolverine loyihasi hozirgi kunda eng ko'p muhokama qilinayotgan o'yinlardan biridir. Sony kompaniyasining yakkaxon o'yinlarni shaxsiy kompyuterlarga port qilishdan bosh tortgani haqidagi xabarlarni hisobga olsak, loyihaning rasmiy ravishda kompyuterlarga chiqishi dargumon. Shunga qaramay, shaxsiy kompyuter ishqibozlari uchun yaxshi xabar paydo bo'ldi: eksperimental KytyPS5 emulyatori ushbu o'yinning dastlabki bosqichlarini ishga tushirishga muvaffaq bo'ldi.

Dastlab ushbu emulator faqatgina o'yin menyusiga kirish va uni ishga tushirish imkonini bergan xolos. Biroq, so'nggi ma'lumotlarga ko'ra, dasturlsh jarayonida sezilarli siljishlar kuzatildi. X ijtimoiy tarmog'ida e'lon qilingan videolarga tayanib, VideoCardz nashri emulyator endi o'yin lavhalari va jarayonini ham ekranga chiqarishga qodir ekanligini ma'lum qildi.

Shunga qaramay, hozirgi bosqichda kadrlar chastotasi hali ham bir xonali raqamlar darajasida qolmoqda. Bu esa o'yinni PS5 yoki PS5 Pro konsollaridan boshqa qurilmalarda to'laqonli o'ynash hali imkonsiz ekanini anglatadi. Mutaxassislarning fikricha, bu holat ko'proq emulyatorning o'zi hali rivojlanishning dastlabki bosqichida ekanligi bilan bog'liq. Dasturchilar bitta o'yinni mukammal qilishdan ko'ra, ko'proq o'yinlarni ishga tushirish ustida ishlamoqda.

KytyPS5 emulyatori grafik chiqish uchun Vulkan 1.3 texnologiyasidan foydalanadi va PS5 konsolining RDNA 2 grafik protsessor buyruqlarini deshifrlash uchun maxsus tizimni qo'llaydi. Hozirgi kunda dastur Windows va Linux tizimlari uchun mavjud bo'lib, macOS uchun esa yanada eksperimental versiyasi tayyorlanmoqda.

Shu bilan birga, boshqa bir SharpEmu nomli eksperimental PS5 emulyatori ham ma'lum yutuqlarga erishdi. Uning mualliflari sinovdan o'tgan 55 ta o'yindan 6 tasini 60 kadr/soniya tezlikda ishga tushirishga muvaffaq bo'lishdi, yana 6 tasi esa pastroq chastotada o'ynash darajasiga yetdi.