AMD Ryzen 9000G haqida xushxabar emas 📉

Texnologiya olamida qizg'in muhokama qilinayotgan AMD'ning yangi Ryzen 9000G protsessorlari haqida kutilmagan xabarlar tarqaldi. Avvalroq ushbu turkum AM5 platformasiga mo'ljallab tayyorlanayotgani va Zen 5 hamda RDNA 3.5 arxitekturalarini birlashtirishi haqida taxminlar qilingan edi. Biroq so'nggi ma'lumotlar barcha kutishlarni o'zgartirib yubordi va texnologiya ishqibozlarini biroz xafa qildi.

Yangi hisobotlarga ko'ra, AMD kompaniyasi Ryzen 9000G seriyasi uchun mutlaqo yangi yo'ldan bormasdan, allaqachon savdoda mavjud bo'lgan 8000G modellari asosiga tayanadi. Bu shuni anglatadiki, ko'pchilik kutgan Zen 5 asosidagi Strix Point arxitekturasi ish stoli qurilmalariga kutilgan muddatdan ancha kechikib keladi. Tarqalgan iddaolarga tayanilsa, haqiqiy ma'nodagi yangi avlod Zen 5 G seriyasini ko'rish uchun keyingi qadamni, ya'ni Ryzen 10000G avlodini kutishga to'g'ri keladi.

Tarixga nazar tashlasak, AMD'ning Ryzen G oilasi ilgari ham sezilarli yangilanishlarni kam olgan. Masalan, kompaniya oldingi avlodlarda butunlay yangi arxitekturaga o'tishdan oldin ayrim seriyalarni o'tkazib yuborgan holatlari kuzatilgan. Hozircha Ryzen 9000G seriyasiga oid aniqlashtirilgan texnik tavsiflar yoki anakart ishlab chiqaruvchilari tomonidan rasmiy ma'lumot taqdim etilmagan.

Agar ushbu tarqalgan ma'lumotlar o'z tasdig'ini topsa, stol usti kompyuterlari foydalanuvchilari uchun haqiqiy arxitektura yangilanishi 2026-yilgacha, yani Strix Point chiqqunga qadar kechikishi mumkin.