📱 Rossiyada smartfonlar savdosi kamaydi

"M.Video" kompaniyasi taqdim etgan tadqiqot ma’lumotlariga ko‘ra, 2026 yilning ilk 37 haftasi mobaynida Rossiya bozorida smartfonlar savdosi qisqargan. Xususan, qurilmalar savdosi dona hisobida 11,7 foizga, pul ko‘rinishida esa 5 foizga kamaydi. Ko‘rsatilgan davr mobaynida umumiy qiymati 390,6 milliard rublga teng bo‘lgan 15,2 million dona mahsulot sotilgan.

Bozordagi asosiy o‘zgarishlar qatorida brendlar o‘rtasidagi talab qayta taqsimlangani ta’kidlandi. Jumladan, umumiy pasayish fonida Samsung va Honor o‘z savdo hajmini ham miqdor, ham pul ko‘rsatkichida oshirishga muvaffaq bo‘ldi. Natijada Samsung pul tushumlari bo‘yicha yetakchilikni egallab, Apple'ni ikkinchi o‘ringa surib chiqardi.

Daromad hajmi bo‘yicha eng yirik beshlikka Samsung, Apple, Redmi, shuningdek savdosi o‘sgan Honor va Realme brendlari kirdi. Sotilgan qurilmalar soni bo‘yicha esa Xiaomi kompaniyasiga qarashli Redmi brendi birinchi o‘rinni egalladi. Undan keyingi o‘rinlardan Samsung, Realme, Honor va Apple joy oldi.

Mutaxassislarning tushuntirishicha, xaridorlar keng modellar qatoriga ega, zamonaviy xususiyatlarga va maqbul narxga ega qurilmalarni ko‘proq tanlamoqda. Buning natijasida bitta smartfonning o‘rtacha narxi 7,6 foizga oshib, 25,8 ming rublni tashkil qildi. Shu sababli bozordagi pul hajmining qisqarishi dona ko‘rsatkichiga qaraganda sekinroq bormoqda.

Ekspertlarning fikricha, joriy vaziyat o‘rtacha va ommaviy narx segmentidagi qurilmalarga talab yuqoriligini ko‘rsatadi. Shuningdek, bu holat xaridorlarning turli narx kategoriyalarida ko‘proq tanlov imkoniyatini taqdim etuvchi Android qurilmalariga intilayotganini bildiradi.