iPhone 17 bozorni egalladi 📱

2026-yilning ikkinchi choragida Apple kompaniyasi o‘zining joriy smartfonlar avlodi savdo ko‘rsatkichlari bo‘yicha sezilarli muvaffaqiyatga erishdi. O‘tkazilgan tadqiqot natijalariga ko‘ra, iPhone 17 global miqyosda eng ko‘p sotilgan smartfon deb topildi. Qizig‘i shundaki, umumiy smartfon bozori o‘tgan yilning shu davriga nisbatan 11 foizga qisqarganiga qaramay, Apple o‘z ko‘rsatkichlarini 5 foizga oshirishga muvaffaq bo‘ldi.

Counterpoint Research ma'lumotlariga ko‘ra, oddiy iPhone 17 modeli global savdolarning 6 foizini tashkil etib, birinchi o‘rinni egalladi. Uning ortidan ikkinchi va uchinchi o‘rinlarni mos ravishda iPhone 17 Pro Max hamda iPhone 17 Pro modellari egalladi. Shunday qilib, Apple reytingning eng yuqori uchligini to‘liq egallagan. Umuman olganda, Amerikaning texnologiya giganti dunyodagi eng ommabop o‘nta smartfon ro‘yxatiga beshta qurilmasini kiritishga muvaffaq bo‘ldi.

O‘nta eng mashhur smartfon birgalikda global savdolarning 26 foizini tashkil qilmoqda, bu esa o‘tgan yilgiga nisbatan ikki foiz punktga ko‘pdir. Mutaxassislarning fikricha, bu holat RAM yetishmovchiligi bilan bog‘liq bo‘lib, ishlab chiqaruvchilar o‘z e'tiborini asosiy modellariga ko‘proq qaratishga majbur bo‘lmoqdalar. Apple ayniqsa Hindiston, Yaponiya, Yaqin Sharq va Afrika mintaqalarida yaxshi natijalarni qayd etdi, Janubiy Koreyada эsa savdolar deyarli ikki baravar ko‘paydi.

Apple muvaffaqiyatiga iPhone 17e modeli ham o‘z hissasini qo‘shdi va reytingdan joy oldi. Bunga MagSafe texnologiyasi hamda narxi o‘tgan yilgi darajada saqlangan holda xotira hajmining oshirilgani sabab bo‘lgani aytilmoqda. Shuningdek, ro‘yxatdagi qolgan beshta o‘rinni Samsung egallagan bo‘lib, Android qurilmalari orasida Samsung Galaxy S26 Ultra flagmani peshqadamlik qilmoqda.