God of War: Laufey o'yiniga onlayn buyurtmalar boshlandi 🎮

Ko'p yillik mish-mish va taxminlardan so'ng, Sony Santa Monica studiyasining navbatdagi o'yini taqdimotiga ham oylar qoldi. God of War: Laufey loyihasi kelgusi yilning fevral oyida PlayStation 5 konsollari uchun rasman sotuvga chiqarilishi kutilmoqda. Qizig'i shundaki, ushbu loyiha disk ko'rinishida chiqariladigan oxirgi yirik PlayStation eksklyuzivlaridan biri bo'lishi kutilmoqda va hozirda o'yin uchun oldindan buyurtmalar qabul qilina boshladi.

PlayStation Blog orqali Sony Santa Monica studiyasi oldindan buyurtma qilish mumkin bo'lgan o'yin nashrlari haqida batafsil ma'lumot berdi va janggovar jarayonlarni yana bir bor namoyish etdi. Xaridorlar raqamli yoki diskli versiyani tanlashidan qat'i nazar, oldindan buyurtma bergan barcha foydalanuvchilar maxsus raqamli bonuslarga ega bo'lishadi. Bu sovg'alar qatoriga "Last Wish" zirhlar to'plami, "Phranque (The Cube)" oltin barglar ko'rinishidagi bezak hamda o'yin ichidagi resurslar to'plami kiradi.

Afsuski yoki yo'q, loyihaning jismoniy kolleksion nashri mavjud emasga o'xshaydi. Standart nusxadan tashqari yagona muqobil variant sifatida "Digital Deluxe" raqamli nashri taqdim etilmoqda. Uning tarkibidan "Dark Alchemy" zirhlar to'plami, qilichi, kamon qoplamasi va katalizatori, o'yin resurslari to'plami, shuningdek raqamli mini-artbuk va rasmiy saundtrek o'rin olgan.

Biroq, muxlislar uchun eng hayajonli yangilik bu o'yin jarayonidan taqdim etilgan yangi lavhalardir. Ular orqali Feyning tezkor va akrobatik kamondan o'q otish jangovar uslubini ko'rish mumkin. Dushmanlarni havoda ushlab turib kombinatsiyalangan zarbalar berish imkoniyati Marvel's Spider-Man yoki Devil Mars Cry o'yinlarini eslatib yuboradi. Ilgari chiqqan 2018 yilgi God of War va Ragnarok o'yinlarining jang tizimlari o'ta maroqli bo'lgan bo'lsa, Laufey o'zgacha yondashuvni qo'llaganiga qaramay, kamida shunchalik silliq va qiziqarli ko'rinmoqda.