Samsung Galaxy F15 5G Geekbench sinovidan o‘tdi 📱

Samsung kompaniyasining Hindistonda o‘tgan yilning dekabr oyida taqdim etilgan Galaxy A15 5G modelidan keyin, endilikda Galaxy F15 5G smartfoni ham Geekbench sinov dasturida ko‘rinish berdi. Bu esa qurilmaning texnik xususiyatlari haqida ilk maʼlumotlarni bilib olish imkonini yaratdi.

Maʼlumotlarga ko‘ra, yangi smartfon A15 5G modeli kabi MediaTek Dimensity 6100+ (6nm) protsessori bilan jihozlangan bo‘lib, uning tarkibiga ikkita 2.2 GHz chastotali Cortex-A76 va oltita 2.0 GHz chastotali Cortex-A55 yadrolari hamda Mali-G57 MC2 grafik protsessori kiradi. Sinov natijalari qurilma Android 14 operatsion tizimi va One UI 6.0 interfeysida ishlashini hamda 4 GB tezkor xotiraga ega ekanini ko‘rsatdi. Galaxy A15 5G modeli 8 GB gacha tezkor xotiraga ega ekanligini hisobga olsak, F15 5G uchun ham 6 GB va 8 GB li modellar taqdim etilishi ehtimoldan xoli emas.

Smartfonning asosiy imkoniyatlari Galaxy A15 5G modeliga o‘xshash bo‘lishi kutilmoqda. Xususan, qurilma 90 Gts yangilanish chastotasiga ega 6.5 dyuymli FHD+ Infinity-U Super AMOLED displeyi, 50 megapikselli asosiy kamerani o‘z ichiga olgan uchlik kamera tizimi va yon qismiga o‘rnatilgan barmoq izi skaneri bilan jihozlanishi taxmin qilinmoqda. Biroq batareya quvvati bo‘yicha farqlar mavjud bo‘lib, A15 5G dagi 5000 mA/soatlik batareya o‘rniga yangi F15 5G modeli 6000 mA/soat sig‘imli akkumulyator va 25 Vt quvvat olish stansiyasini olishi aytilmoqda.

Shuningdek, hafta boshida tarqalgan render suratlarida smartfonning yanada yumaloq dizaynga egaligi hamda qora, binafsha va yalpiz ranglarda chiqarilishi maʼlum bo‘lgan edi. Hozirgi vaqtda Samsung Galaxy F15 5G Hindistonning BIS sertifikatidan o‘tgani va mamlakatdagi qo‘llab-quvvatlash sahifasida paydo bo‘lgani uning taqdimoti juda yaqin qolganidan dalolat beradi.