Radeon 880M o'yini 13% tezroq ishlaydi 🎮

Hozircha hech bir ishlab chiqaruvchi AMD Strix Point chipli o'yin konsolini taqdim etgani yo'q. Biroq, oktabr oyida ushbu yangi Zen 5 chiplari bilan jihozlangan mini kompyuterlar savdoga chiqishi kutilayotgani bois, portativ qurilmalar haqida ham tez orada e'lonlar bo'lishi mumkin. Ulardagi eng asosiy yangilanish sifatida RDNA 3.5 grafik yadrolari ko'rsatilmoqda.

Avvalroq Radeon 890M grafikasiga ega AMD Ryzen AI 9 HX 370 17 vattlik quvvat chegarasida sinovdan o'tkazilib, avvalgi Radeon 780M ga nisbatan sezilarli o'sishni ko'rsatgan edi. Endilikda esa ETA Prime kanali muallifi Ryzen AI 9 365 chipidagi Radeon 880M grafik tezlatgichini shunga o'xshash test sinovidan o'tkazdi.

Sinov jarayonida bir qator o'yinlar sinab ko'rildi. Jumladan, Horizon Zero Dawn o'yinida 1080p o'lchami va o'rta sozlamalarda Ryzen Z1 Extreme bazasidagi Radeon 780M o'rtacha 52 kadr tezlikni taqdim etgan bo'lsa, Ryzen AI 9 365 60 kadrga erishdi. Cyberpunk 2077 o'yinida esa 780M 55 kadr ko'rsatgan bo'lsa, Radeon 880M 63 kadr tezlikni qayd etdi.

Mutaxassisning ta'kidlashicha, eskiroq o'yinlarda farq yanada sezilarli bo'ladi. Misol uchun, Fallout 4 o'yinida eski avlod chipi 55 atrofida kadr ko'rsatsa, yangi protsessor doimiy ravishda 60 kadrni ushlab turdi va ba'zi hollarda 80 kadringacha chiqdi. Shuningdek, Forza Horizon 5 o'yinida ham 780M o'rtacha 60 kadr ko'rsatgan bo'lsa, Radeon 880M o'rtacha 76 kadr tezlikni ta'minladi.

Youtuber ayrim o'yinlarni yuqoriroq quvvat sarfida ham sinab ko'rdi. 25 vatt quvvatda Red Dead Redemption 2 o'yini Z1 Extreme'da 38 kadrni tashkil qilgan bo'lsa, AI 9 365 42 kadrni ko'rsatdi. Biroq Shadow of the Tomb Raider o'yinida buning aksi kuzatilib, eski chip 43 kadr, yangisi esa 41 kadr natija qayd etdi.

Umuman olganda, Zen 5 protsessorining yangi grafik yadrosi taxminan 13 foizga tezroq ishlaydi, biroq bu ustunlik asosan quvvat sarfi past diapazonlarda yaqqol seziladi. Quvvat sarfi yuqori bo'lganda bu farq unchalik sezilmasligi mumkin edi.

Shunga qaramay, quvvat sarfi past holatda ham yaxshiroq natija ko'rsatishi batareya quvvati uchun foydalidir. Shunga qaramasdan, Radeon 780M chipiga ega portativ qurilma egalari uchun bu yangi modelga o'tishga yetarli darajada asos bo'la olmaydi.