Nvidia rahbaridan yadro energiyasi bo'yicha bayonot ☢️

Sun'iy intellekt va zamonaviy texnologiyalarning jadal taraqqiyoti fonida yirik ma'lumotlar markazlarining quvvatga bo'lgan ehtiyoji kundan-kunga ortib bormoqda. Nvidia bosh direktori Jensen Huang yaqinda bergan intervyusida texnologiya gigantlari duch kelayotgan mazkur muammoni bartaraf etish uchun yadro energiyasiga yuzlanishi mumkinligini ma'lum qildi.

Ushbu bayonot Microsoft kompaniyasining o'z ma'lumotlar markazlarini quvvatlantirish maqsadida Three Mile Island yadro stansiyasini qayta ishga tushirish bo'yicha kelishuvga erishganidan ko'p o'tmay yangradi. Huangning ta'kidlashicha, yadro energetikasi Nvidia kompaniyasining energiya manbalarini kengaytirish strategiyasiga mos kelishi va u barqaror energiya manbalari orasida eng yaxshilaridan biri hisoblanadi.

Xalqaro energetika agentligi ma'lumotlariga ko'ra, 2022-yilda 460 teravatt-soatni tashkil etgan ma'lumotlar markazlarining elektr iste'moli 2026-yilga borib ikki baravar oshib, 650 dan 1050 teravatt-soatgacha yetishi kutilmoqda. Shu sababli Microsoft, Amazon va Google kabi yirik kompaniyalar energiya taqchilligini yengish va zararli chiqindilarni kamaytirish uchun yadro stansiyalariga murojaat qilmoqda.

Jensen Huang suhbat davomida "sun'iy intellekt fabrikalari" deb ataluvchi bunday markazlarni qurishdagi qiyinchiliklarga ham to'xtaldi. Energiya cheklovlari tufayli mazkur inshootlar odatda aholi yashash punktlaridan uzoqda barpo etiladi. Shuningdek, u Nvidia kompaniyasi AQShning Xitoyga chip eksport qilish bo'yicha cheklovlariga qat'iy rioya qilishini bildirdi va yangi avlod chiplari energiya tejamkor bo'lishiga qaramay, umumiy jihatdan yana-da ko'proq quvvat talab qilishini qo'shimcha qildi.