AMD sun'iy intellekt sohasini zabt etmoqda 🚀

Sun'iy intellekt sohasidagi eng nufuzli tadqiqotchilardan biri AMD kompaniyasining milliardlab dollarlik yangi loyihasining markazida turibdi. Dushanba kuni e'lon qilingan xabarga koʻra, AMD San-Fransiskoda joylashgan World Labs startapini toʻliq aksiya shaklidagi bitim orqali sotib oladi. Ushbu kelishuvning umumiy qiymati taxminan 8,2 milliard dollarni tashkil etadi.

2024 yilda Stenford universiteti professori Fei-Fei Li tomonidan asos solingan World Labs "dunyo modellari" deb nomlanuvchi sun'iy intellekt tizimlarini yaratmoqda. Ushbu texnologiya matn, tasvir va videolar asosida interaktiv 3D muhitlarni shakllantirish hamda qayta tiklash imkoniyatiga ega. Mazkur ishlanmalar kelgusida robotlarni oʻqitish, zavodlarni simulyatsiya qilish va ilmiy tadqiqotlarni rivojlantirish uchun ishlatilishi mumkin.

Koʻpincha sun'iy intellektning "choʻqintirgan onasi" deb ataladigan Li kompyuter koʻrish texnologiyalarini rivojlantirishga katta hissa qoʻshgan ImageNet ma'lumotlar bazasini yaratgani bilan tanilgan. U avvalroq Google Cloud kompaniyasida sun'iy intellekt boʻyicha bosh olim boʻlib ishlagan va Stenford universitetining Insonparvarlik sun'iy intellekt instituti asoschilaridan biri boʻlgan.

Shu oy boshida World Labs bir nechta 2D tasvirlar yordamida sahnaning boshqa kamera burchagidan qanday koʻrinishini oldindan bashorat qiluvchi Atlas nomli yangi sun'iy intellekt modelini taqdim etgan edi. Kompaniya bu yondashuvni yirik til modellarining gapdagi keyingi soʻzni topishiga qiyoslaydi.

AMD bosh direktori Liza Su matbuot anjumanida ushbu xarid chip ishlab chiqaruvchiga ilgʻor sun'iy intellekt modellarining rivojlanish jarayonini chuqurroq oʻrganishga yordam berishini ta'kidladi. Bu oʻz navbatida ularni quvvatlantirish uchun zarur boʻlgan chiplar va hisoblash tizimlarini yaratishni osonlashtiradi. Eslatib oʻtamiz, AMD sun'iy intellekt chiplari bozorida Nvidia kompaniyasining asosiy raqobatchilaridan biri hisoblanadi.

Imzolangan shartnomaga koʻra, Fei-Fei Li AMD safiga bosh olim va ijrochi vitse-prezident sifatida qoʻshiladi hamda bevosita bosh direktor Liza Suga hisobot berib boradi.