🎮 Yangi ONEXPLAYER ONEXFLY taqdim etildi

One-Netbook kompaniyasi o‘zining ONEXPLAYER ONEXFLY portativ o‘yin konsolini yangiladi. Bozorda deyarli bir yildan beri mavjud bo‘lgan ushbu gadjetdan tashqari, ishlab chiqaruvchi shu vaqt ichida X1 Mini va kattaroq X1 modelining yangi turlarini ham taqdim etgandi. Biroq so‘nggi yangilangan ONEXFLY tashqi ko‘rinishi bo‘yicha avvalgi avloddan deyarli farq qilmaydi.

Asosiy o‘zgarishlar qurilmaning ichki qismiga daxldor. Ishlab chiqaruvchi ixcham konsolni Ryzen 7 8840U protsessori bilan ta'minladi. Bu chip oldingi modeldagi Ryzen 7 7840U protsessoriga nisbatan unchalik katta bo‘lmagan yaxshilanishni taqdim etadi. O‘tkazilgan testlarga ko‘ra, yangi protsessor avvalgisidan atigi 3 foizgina ustunlikka ega xolos. Shu bilan birga, har ikkala protsessor ham Radeon 780M grafik tezlatgichiga ega. Shu sababli, yangi talqin talabchan AAA o‘yinlari kabi grafikaga tayanuvchi vazifalarda o‘tmishdosjidan sezilarli darajada ustun kelishi ehtimoldan yiroq.

Hozirgi vaqtda yangilangan o‘yin konsolining boshlang‘ich narxi 999 dollarni tashkil qilmoqda. Ushbu summa evaziga xaridorlar 32 GB tezkor xotira va 1 TB doimiy xotiraga ega qurilmani qo‘lga kiritishadi. Ta'kidlash joizki, bu narx dastlabki ONEXFLY modelining 739 dollarlik boshlang‘ich narxidan sezilarli darajada qimmatroq. Biroq eski boshlang‘ich versiya atigi 16 GB tezkor va 512 GB doimiy xotira bilan chiqqan edi.

Shuningdek, xaridorlar 2 TB xotiraga ega talqinni ham xarid qilishlari mumkin. Garchi qurilmaning turli xotira turlari mavjud bo‘lsa-da, maqola yozilgan vaqtda 64 GB tezkor xotiraga ega opsiya sotuvga chiqarilmagan.