Xbox Game Pass narxlari oshdi va yangi tarif qo‘shildi 🎮

Microsoft kompaniyasi ommabop Xbox Game Pass obuna xizmatida keng ko‘lamli o‘zgarishlar va narx siyosati yangilanganini e’lon qildi. Ushbu o‘zgarishlar 2024-yil 10-iyuldan boshlab kuchga kirib, yangi foydalanuvchilar uchun Ultimate, Core va PC tariflari qiymatining oshishiga olib keldi. Shu bilan birga, konsollar uchun mo‘ljallangan maxsus Game Pass obunasi yangi xaridorlar uchun to‘xtatildi.

Yangi tartibga ko‘ra, Xbox Game Pass Ultimate oylik narxi 17 dollardan 20 dollarga ko‘tarildi. PC Game Pass narxi esa oyiga 10 dollardan 12 dollarga oshgan bo‘lib, u o‘z ichiga chiqarilgan kuniyoq o‘yinlarni taqdim etish imkoniyatini saqlab qoladi. Xbox Game Pass Core tarofining yillik to‘lov miqdori 60 dollardan 75 dollarga yetkazildi, uning oylik narxi esa o‘zgarishsiz 10 dollarligicha qoldi. Shuningdek, yaqin orada oyiga 14.99 dollardan baholanadigan Xbox Game Pass Standard deb nomlangan yangi tarif sotuvga chiqarilishi rejalashtirilgan.

Konsollar uchun mo‘ljallangan eski tarifga to‘xtaladigan bo‘lsak, 2024-yil 10-iyuldan e’tiboran unga yangi obunalar qabul qilinmaydi. Biroq avtomatik to‘lov funksiyasini faollashtirgan amaldagi obunachilar o‘z a’zoligini saqlab qolishlari mumkin. Agar avtomatik to‘lov o‘chirilgan bo‘lsa, xizmatdan foydalanish to‘xtatiladi va boshqa tarifga o‘tish talab etiladi. Konsol tarifi kodlari hozircha faol qoladi, lekin 2024-yil 18-sentabrdan boshlab obunani uzaytirish muddati ko‘pi bilan 13 oygacha cheklanishi ma’lum qilindi.

Jahon miqyosidagi bu o‘zgarishlar yangi obunalar uchun 10-iyuldan, amaldagi foydalanuvchilar uchun esa 12-sentabrdan e’tiboran amal qiladi. Ayrim davlatlar mazkur yangilanishlardan istisno qilingan. Sentyabr oyidan keyingi birinchi hisob-kitob davridan boshlab takroriy to‘lovlar yangilangan narxlarda yechila boshlaydi, to‘lov sanalarining o‘zi esa o‘zgarishsiz qoladi.