🎮 Lisa va PlayStation maxsus geympadni taqdim etdi

PlayStation va jahonga mashhur musiqa yulduzi Lisa o'rtasidagi hamkorlik doirasida yangi cheklangan nusxadagi DualSense simsiz geympadi hamda maxsus mahsulotlar to'plami e'lon qilindi. Mazkur loyiha o'tgan yili xonanda ishtirok etgan global PS5 reklama kampaniyasining mantiqiy davomi bo'lib, bu safar hamkorlik to'g'ridan-to'g'ri jihozlar va buyumlarni qamrab olgan holda kengaytirildi. Lisa ushbu to'plam dizaynini yaratish jarayonida bevosita ishtirok etdi.

Lisa Limited Edition deb nomlangan maxsus geympad xonandaning shaxsiy sevimli rangi deb ta'riflangan Chroma Pearl ranglar gammasida ishlab chiqilgan. Qurilmaning sensorli panelida Lizaning soch popugi va ko'zlari yaqqol ko'rinib turadi. Shuningdek, dizayndan uning o'ziga xos yulduzlari va qalin "LL" harflari ham joy olgan. PlayStation ma'lumotlariga ko'ra, barcha tashqi detallar xonanda uchun shaxsiy ahamiyatga ega bo'lgan elementlarni aks ettirish maqsadida uning o'zi bilan birgalikda ishlab chiqilgan.

Qurilma uchun oldindan buyurtma berish jarayoni AQSh, Buyuk Britaniya, Fransiya, Germaniya va boshqa qator Yevropa davlatlarida 2-oktabr kuni mahalliy vaqt bilan soat 10:00 da boshlanadi. Geympadning global savdosi 30-oktabrga belgilangan bo'lib, u juda cheklangan miqdorda to'g'ridan-to'g'ri PlayStation va hamkor chakana sotuvchilar orqali sotuvga chiqariladi.

Qurilmadan tashqari, Lisa x PlayStation maxsus mahsulotlar to'plami ham taqdim etildi. Unga kiyim-kechak, bosh kiyimlar, sumkalar, breloklar, stikerlar, geympad uchun maxsus g‘ilof va boshqa buyumlar kiritilgan. Ushbu to'plamdagi ayrim mahsulotlarga 2-oktabrdan boshlab oldindan buyurtma berish mumkin bo'lib, ular 30-oktabrda sotuvga chiqadi. Ikkinchi to'plamdagi buyumlar esa 23-oktabrdan boshlab Lizaning rasmiy Amazon do'koni va Amazon Music ilovasi orqali erta taqdim etiladi.