Apple iPhone dizaynini tubdan o‘zgartirmoqda 📱

Apple kompaniyasi iPhone smartfonlarining tashqi ko‘rinishi va konstruksiyasini tubdan yangilashga qaratilgan ulkan rejalarini ma’lum qildi. Mutaxassislarning taxmin qilishicha, joriy yilning kuz faslidayoq foydalanuvchilar brend tarixidagi ilk buklanadigan smartfonga guvoh bo‘lishlari mumkin. Ushbu qurilma Samsung Z Fold turkumiga raqobat tug‘dirib, yoyilgan holatda katta displey hosil qiladi va foydalanuvchilarga video tomosha qilish, murakkab o‘yinlar hamda ko‘p vazifali rejimda ishlash uchun keng imkoniyatlar yaratib beradi.

Mashhur Bloomberg jurnali ekspertining fikricha, bo‘lajak iOS 27 operatsion tizimi aynan shu buklanadigan formatga moslashtirilgan ilk dasturiy ta’minot bo‘ladi. Yangi interfeys kengaytirilgan ekran maydoniga moslashib, ilovalarni qulay joylashtirishni ta’minlaydi. Muhandislar ekran bukiladigan joydagi burmani butunlay yo‘q qila olmagan bo‘lsalar-da, uni sezilarli darajada kamaytirishga va mexanik birikma tizimini maksimal darajada takomillashtirishga erishdilar.

Kelgusida esa Apple iPhone chiqarila boshlanganining 20 yilligi nishonlanadigan 2027-yilda butun old panelni displey bilan qoplagan, hech qanday ramkasiz modelni taqdim etishni rejalashtirmoqda. Ushbu loyihaga ko‘ra, old kamera va barcha datchiklar bevosita ekran ostiga joylashtiriladi. Bu g‘oya kompaniya asoschisi Stiv Jobsning azaliy orzusi bo‘lib, Apple bunga erishish yo‘lida iPhone X, iPhone 14 Pro hamda ingichka korpusli iPhone Air modellarini bosqichma-bosqich taqdim etib kelgan edi.

Biroq, mutaxassislar ta’kidlaganidek, 2027-yilgacha bu texnologiyani ommaviy ishlab chiqarish darajasiga yetkazishga ulgurish yoki ulgurmaslik hozircha noma’lumligicha qolmoqda. Shunga qaramay, joriy yilning kuzida kompaniya e’tiborni iPhone 18 Pro, iPhone 18 Pro Max flagmanlari va mutlaqo yangi buklanadigan iPhone taqdimotiga qaratishni rejalashtirgan.