Australian Open NFT va Decentraland olamiga kiradi 🎾

Avstraliya ochiq chempionati oʻzining noyob NFT toʻplami chiqarilishini va Decentraland meta-olamida maxsus virtual tadbir oʻtkazilishini maʼlum qildi. Ushbu tashabbus doirasida turnir oʻyinlardagi ochkolarni baholash uchun qoʻllaniladigan elektron chiziqlarni aniqlash texnologiyasidan foydalanib, NFT maʼlumotlarini yigʻadi. Loyiha rahbari Ridli Plummerning taʼkidlashicha, musobaqa davomida ishlatiladigan har bir tennis toʻpining tuklari turlicha boʻlib, bir xil toʻplar uchramaydi. uning qoʻshimcha qilishicha, bu jarayon juda murakkab tus olgan boʻlsa-da, tashkilotchilar buni oʻz zimmalariga olishgan.

Chempionatning hal qiluvchi final uchrashuvidagi soʻnggi gʻolib ochkolar NFT egalariga maxsus oʻyib ishlangan qutiga solingan haqiqiy tennis toʻpini taqdim etadi. Raqamli aktivlarni chiqarish jarayoni 13-yanvar sanasiga belgilangan boʻlib, bitta NFT narxi 350 AQSh dollari yoki 0.067 ETH ni tashkil qiladi.

Shuningdek, turnir Decentraland meta-olamida maxsus virtual tadbir tashkil etmoqda. 17-yanvardan boshlanadigan bu bayram butun musobaqa davomida davom etadi. Grand Slamʼning virtual versiyasiga qoʻshilgan muxlislar oddiy vazifalarni bajarish orqali turli raqamli sovrinlarni yutib olish imkoniyatiga ega boʻladilar. Plummerning soʻzlariga koʻra, istalgan muxlis ushbu jarayonga qoʻshilib, kompyuter ekrani orqali Avstraliya yozining iliq muhitini his qilishi mumkin. U bu kabi virtual tadbirlar oxirgisi boʻlmasligini ham qoʻshimcha qildi.

Meta-olamga yuzlanish COVID-19 pandemiyasi sababli yuzaga kelgan cheklovlar fonida kutilmagan holat emas. Hozirgacha pandemiya tufayli koʻplab tadbirlar virtual muhitda tashkil etilgan boʻlib, bunga misol tariqasida One Times Square egasining Decentralandʼda Yangi yil ziyofatini oʻtkazganini keltirish mumkin. Avstraliya ochiq chempionati oʻzini dunyodagi eng innovatsion va qiziqarli musobaqalardan biri sifatida koʻrsatadi. Plummer taʼkidlaganidek, bu tadbir faqatgina tennis musobaqasi emas, balki haqiqiy koʻngilochar festival hamdir. Aslida, turnirga tashrif buyurib, birorta ham tennis toʻpini koʻrmasdan 8-9 soat vaqt oʻtkazadigan odamlar ham topiladi.