Binance Hamyon USDT tranzaksiya toʻlovlarini qoʻshdi 🌐

Binance Hamyon oʻz foydalanuvchilari uchun muhim yangilikni joriy etib, toʻrtta asosiy blokcheyn tarmogʻida tranzaksiya toʻlovlarini USDT barqaror tangasi orqali amalga oshirish imkoniyatini ochdi. Ushbu oʻzgarish 25-sentabrdan boshlab kuchga kirdi va u foydalanuvchilarga har bir tarmoqning oʻziga xos asosiy tokeniga ega boʻlmasdan ham amaliyotlar bajarishga sharoit yaratadi.

Yangi funksiya hozirgi vaqtda BNB Smart Chain, Ethereum, Solana hamda TRON tarmoqlarini qamrab olgan. Bungacha foydalanuvchilar tegishli tarmoqlarda amaliyot oʻtkazish uchun tarmoqning asl tokeniga, jumladan BNB, ETH, SOL yoki TRX tangalariga ega boʻlishi majburiy edi. Agar hamyonda ushbu tokenlar yetarli boʻlmasa, mablagʻni koʻchirish imkoni boʻlmasdi.

Kompaniyaning ta’kidlashicha, tarmoq komissiyalari toʻgʻridan-toʻgʻri Binance kompaniyasiga emas, balki blokcheyn validatorlariga yoki boshqa tarmoq qatnashchilariga borib tushadi. Blokcheyn tarmoqlaridagi shartlarga qarab komissiya miqdori oʻzgarib turadi. Masalan, Ethereum Virtual Machine tarmoqlari va Solanada faollik oshgan paytda toʻlovlar ham yuqoriroq boʻlishi mumkin.

Shuningdek, foydalanuvchilar hamyonda yetarli USDT boʻlmagan taqdirda, oʻzlarining Binance birjasidagi hisobvaraqlari orqali ham toʻlovlarni qoplash imkoniyatiga ega. Rasmiy sahifadagi ma'lumotlarga ko'ra, Spot, Funding yoki Earn balanslaridagi qo'llab-quvvatlanadigan aktivlar yordamida ham xarajatlarni to'lash mumkin. Kelgusida mazkur funksiya boshqa tarmoqlarga ham kengaytirilishi kutilmoqda, biroq buning aniq muddati hozircha e’lon qilinmagan.