Apple Mac uchun Asahi Linux yangilandi 🐧

Apple kompaniyasining M1 va M2 protsessorlari bilan jihozlangan kompyuterlari uchun maxsus moslashtirilgan Asahi Remix Linux-distributivining navbatdagi yirik yangilanishi e'lon qilindi. Mazkur reliz nafaqat asosiy dasturiy paketlarni yangiladi, balki Apple qurilmalarida Windows o'yinlarini ishga tushirishga qiziquvchi foydalanuvchilar uchun ham muhim o'zgarishlarni olib keldi.

Fedora Linux 41 bazasida yaratilgan yangi operatsion tizim to'plami zamonaviy Vulkan 1.4 drayveri hamda x86/x86_64 arxitekturasini emulyatsiya qiluvchi yangilangan dasturlar tufayli AAA darajasidagi o'yinlarni qo'llab-quvvatlash imkoniyatiga ega bo'ldi. Shuningdek, o'yinqarlar uchun mo'ljallangan ushbu to'plam tarkibiga Valve Proton vositasi, ARM64 uchun mo'ljallangan FEX emulyatori hamda Vulkan asosida Direct3D'ni amalga oshiruvchi vk3d-proto dasturlari kiritildi.

Fedora Asahi Remix 41 foydalanuvchilarga Plasma 6.2 yoki GNOME 47 ish stoli muhitlari bilan taqdim etiladi. Tizim yangilangan DNF 5 paketlar menejeri va GIMP 3.0 grafika muharriri bilan jihozlangan bo'lib, ikkala versiyada ham Wayland protokolidan foydalaniladi. Shuningdek, X11 ilovalarini ishga tushirish uchun maxsus XWayland DDX-serveri qo'shildi va standart OpenGL 4.1 drayverlaridan tashqari OpenGL 4.6 hamda OpenGL ES 3.2 qo'vvatlovi ham ta'minlandi.

Dasturchilarning ta'kidlashicha, ular foydalanuvchilar duch keladigan asosiy moslik muammolarining katta qismini bartaraf etishga erishgan. Biroq, joriy versiyada hozircha Thunderbolt portlari, jumladan tashqi ekranlarga tasvir chiqarish, shuningdek mikrofon va Touch ID skanerining ishlashida ayrim muammolar mavjud. Yangi Fedora Asahi Remix 41 distributivini loyihaning rasmiy veb-sayti orqali yuklab olish mumkin.