Binance Eron bilan bog'liq tranzaksiyalar uchun tekshirilmoqda 🚨

AQSh rasmiylari Dubayda joylashgan yirik Binance kriptovalyuta birjasiga nisbatan yangi tekshiruv boshladi. Tergovchilar birja AQSh sanksiyalarini chetlab o'tgan holda Eron bilan bog'liq tranzaksiyalarni bilib turib amalga oshirilishiga yo'l qo'yganini aniqlashga harakat qilmoqda.

Bloomberg agentligining xabar berishicha, ushbu surishtiruvga Manxetten AQSh prokuraturasi hamda Adliya vazirligining Vashingtondagi bo'limi rahbarlik qilmoqda. Avvalroq, joriy yil boshida nufuzli nashrlar Xitoydagi ikkita kompaniya Eron neft savdosini davom ettirish va sanksiyalardan qochish rejasi doirasida Binance platformasida milliardlab dollarlik kripto savdolarini amalga oshirgani haqida yozgan edi.

O'sha paytda ushbu xabarlarni tuhmat deb atagan Binance birjasi Bloomberg nashriga bergan izohida sanksiyalar buzilishiga chidamsiz ekanini ta'kidladi. Kompaniya vakillari huquq-tartibot idoralari bilan to'liq hamkorlik qilishini hamda qoidabuzar foydalanuvchilarni aniqlab, ularning faoliyatiga chek qo'yishga sodiqligini bildirdi.

Mart oyida Adliya vazirligi Eron bilan bog'liq mablag'lar yuzasidan dastlabki tergovni boshlagani xabar qilingan edi. O'sha oyning o'zida esa Binance Wall Street Journal gazetasini tuhmat uchun sudga bergan edi. Shuningdek, oy boshida AQSh hukumati Eronning neft savdosi bilan bog'liq deb taxmin qilingan va muzlatib qo'yilgan 61 million dollarlik USDT kriptovalyutasini musodara qilish rejasini e'lon qildi. Hukumat ma'lumotlariga ko'ra, ushbu sxema Eron harbiy va yadro dasturlari uchun 1,5 milliard dollar miqdorida kriptovalyuta daromadini keltirib chiqargan.