⚖️ Musk va OpenAI mojarosi tezlashdi

OpenAI kompaniyasining asoschilaridan biri bo'lgan Ilon Mask 2024 yilda ushbu tashkilot va uning rahbari Sem Altman ustidan sudga shikoyat qilgan edi. Maskning fikricha, sun'iy intellekt texnologiyalarini insoniyat ravnaqi yo'lida rivojlantirish o'rniga, hozirda yirik texnologiya korporatsiyalariga moliyaviy foyda keltirish ustuvor vazifaga aylangan. Bunaqangi yondashuv kompaniyaning dastlabki maqsadlaridan butunlay farq qilishini ta'kidlagan tadbirkor OpenAI faoliyatini tanqid qilib kelmoqda.

Bunga javoban OpenAI va Sem Altman barcha ayblovlarni rad etishdi. Ularning ta'kidlashicha, Ilon Maskning asosiy niyati o'zining xAI kompaniyasining raqobatbardoshligini oshirishdan iborat. Tomonlar o'rtasidagi ziddiyat kundan-kunga chuqurlashib bormoqda va sud bu borada qadamlar tashlamoqda.

Yaqinda sud Maskning OpenAI tuzilmasini tijorat maqsadlariga o'tkazish jarayonini to'xtatish haqidagi talabini rad etdi. Biroq sud ishi tezlashtirilgan tartibda ko'rib chiqilib, joriy yilning kuz oylariga belgilandi. OpenAI rahbariyati sudning bu qarorini mamnuniyat bilan kutib olganini rasmiy blog postida ma'lum qildi.

Tez rivojlanib borayotgan sun'iy intellekt bozorida raqobatbardosh bo'lib qolish uchun OpenAI'ga yirik miqdordagi sarmoyalar zarur. Shu sababli kompaniya tuzilmasini o'zgartirish muqarrar ekanligi ta'kidlanmoqda. O'tgan yili 6.6 milliard dollar mablag' jalb qilgan kompaniya, hozirda Yaponiya giganti SoftBank bilan 40 milliard dollarlik yangi investitsiya bosqichi bo'yicha muzokaralar olib bormoqda. Ushbu investitsiyalar muvaffaqiyatli yakunlanishi uchun OpenAI o'zining boshqaruv tuzilmasida o'zgarishlar qilishi lozimligi aytilmoqda.

Bundan tashqari, Ilon Mask yaqinda OpenAI'ni sotib olish uchun 97.4 milliard dollarlik ulkan taklif kiritgan edi. Biroq Sem Altman bu taklifga juda qisqa va aniq tarzda rad javobini berib, "Yo'q, rahmat", deb javob qaytargandi.