Like a Dragon: Pirate Yakuza in Hawaii talablari 🏴‍☠️

SEGA va Ryu Ga Gotoku studiyasi oʻyinchilarga "Like a Dragon: Pirate Yakuza in Hawaii" nomli yangi pirat ekshnining texnik talablari haqida maʼlumot berdi. Maʼlum boʻlishicha, ushbu loyiha unchalik kuchli boʻlmagan kompyuterlarda ham bemalol ishlay oladi.

Minimal darajadagi tizim talablari Full HD formatida past grafik sozlamalarida va 30 kadr tezlikda oʻynash imkonini beradi. Buning uchun Intel Core i5-3470 yoki AMD Ryzen 3 1200 protsessori, 8 GB tezkor xotira hamda NVIDIA GeForce GTX 1650, AMD Radeon RX 560 yoki Intel Arc A380 videokartasi talab etiladi.

Yuqoriroq tavsiya etilgan talablar esa Full HD sifatda, yuqori grafik sozlamalari va 60 kadr tezlikni taʼminlaydi. Bunda foydalanuvchilarga Intel Core i7-4790 yoki AMD Ryzen 5 1600 protsessorlari, 16 GB operativ xotira hamda NVIDIA GeForce RTX 2060, AMD Radeon RX 5700 yoki Intel Arc A750 videokartasi kerak boʻladi. Shuningdek, oʻyinni oʻrnatish uchun qattiq diskda 56 GB boʻsh joy boʻlishi zarur, SSD esa shart emasdek koʻrinmoqda.

Syujet tafsilotlariga koʻra, xotirasini yoʻqotib qoʻygan sobiq yakuza endilikda qaroqchilar kapitaniga aylanadi. U oʻz jamoasi bilan quruqlik va dengizdagi janglarda qatnashib, yoʻqolgan xotirasi hamda afsonaviy xazinani qidiradi. Ushbu sarguzashtli oʻyin joriy yilning 21-fevralida ham shaxsiy kompyuterlar, ham avvalgi hamda hozirgi avlod konsollari uchun sotuvga chiqariladi.