⚖️ Dasturiy ta'minot patentlariga qarshi kurash

Erkin dasturiy ta'minot fondi, notijorat dasturiy ta'minot ishlab chiqaruvchilariga yuridik yordam ko'rsatuvchi Software Freedom Law Center (SFLC) huquqiy markazi hamda ochiq kodli litsenziyalarni tekshiruvchi OSI (Open Source Initiative) tashkiloti o'z sa'y-harakatlarini birlashtirdi. Ular Alic korporatsiyasi va CLS banki o'rtasida dasturiy ta'minot patentlari yuzasidan o'tayatgan sud muhokamasida mustaqil ishtirokchi sifatida birgalikda chiqish qildi.

Ushbu tashkilotlar nizolashayotgan tomonlarning hech biriga tegishli bo'lmagan, biroq adolatli sud qarori chiqarilishidan manfaatdor bo'lgan uchinchi shaxs huquqidan foydalandi. Natijada ular sudga dasturiy ta'minot patentlari bilan bog'liq muammolarni baholovchi maxsus xulosani taqdim etishdi.

Taqdim etilgan xulosada "Bilski Kapposga qarshi" ishida muhokama qilingan "mexanizm yoki o'zgarish" tekshiruvi texnologiyaning patentlanishi mumkinligini tasdiqlash uchun yetarli ekanligi ko'rsatilgan. Mazkur tamoyilga ko'ra, patentlanishi lozim bo'lgan jarayonlar aniq mexanizm yoki qurilmaga bog'langan bo'lishi hamda jismoniy darajada predmetni boshqa holatga o'zgartirishi shart.

Mutaxassislar dasturiy ta'minotga asos solgan g'oyalarni tavsiflovchi patentlar nafaqat "mexanizm yoki o'zgarish" mezoniga javob bermasligini, balki AQSh Konstitutsiyasining Birinchi tuzatishiga ham zid kelishini ta'kidlab o'tdi.