📱 Google Pixel'da jiddiy xatolik kuzatildi

Google kompaniyasining sentyabr oyi uchun mo‘ljallangan Pixel Drop yangilanishi foydalanuvchilarga nafaqat yangi funksiyalar, balki kutilmagan muammolarni ham olib keldi. Yangi vidjetlar va xavfsizlik imkoniyatlari taqdim etilganiga qaramay, bir guruh egalari smartfonni qulfdan chiqarish tizimida jiddiy nosozlikka duch keldi. Internetdagi muhokamalarga ko‘ra, o‘rnatilgan yangilanishdan keyin ba'zi qurilmalar foydalanuvchi kiritayotgan PIN-kod yoki grafik kalitni noto‘g‘ri deb qabul qila boshlagan.

Xususan, Reddit platformasida Pixel 10 Pro XL egasi sentyabr oyidagi paketni o‘rnatgach, ekran qulfini ochish imkonidan mahrum bo‘lganini yozgan. Uni qayta ishga tushirish, ekran tozaligini tekshirish yoki xavfsiz rejimdan foydalanish ham natija bermagan. Shuningdek, sichqoncha ulash urinishlari ham yordam bermagan va oxir-oqibat barcha ma'lumotlarni o‘chirib yuboradigan zavod sozlamalariga qaytarish usuligagina murojaat qilishga to‘g‘ri kelgan.

Shunga o‘xshash holat Pixel 8a smartfoni egasida ham kuzatilgan. Bunda qurilma PIN-kodning faqat birinchi raqamini kiritiboq uni avtomatik qabul qilib yuborgan va keyin xatolik haqida xabar bergan. Ko‘plab boshqa foydalanuvchilar ham shunga o‘xshash qiyinchiliklarga duch kelganliklarini bildirishgan.

Hozircha mazkur xatolik qanchalik keng tarqalgani noma'lum, chunki shikoyatlar cheklangan miqdordagi qurilmalardan kelib tushmoqda. Google kompaniyasi ushbu holatdan xabardor ekani va hatto muhokamalardagi ayrim egalar bilan shaxsan bog‘langani aytilmoqda. Shunga qaramay, kompaniya hali ommaviy rasmiy bayonot bermagan.