Nvidia RTX 6000 videokartalari 2028-yilgacha qoldirildi 🎮

Texnologiya olamida tarqalgan xabarlarga ko‘ra, Nvidia o‘zining navbatdagi avlod o‘yin grafik kartalarini chiqarish vaqtini yana ortga surdi va yangi qurilmalar 2028-yilda savdoga chiqishi kutilmoqda. Garchi bu ma'lumotlar hozircha faqat nazariy bo‘lib, kompaniya tomonidan rasman tasdiqlanmagan bo‘lsa-da, taniqli insayder Kopite7kimi ushbu mahsulotlar yana kechiktirilganini ma'lum qildi. Dastlab qurilmalar kelgusi yildayoq taqdim etilishi rejalashtirilgan edi.

Boshqa bir manba — YouTubedagi Moore's Law is Dead kanali esa RTX 6000 seriyasi 2027-yilda chiqishini taxmin qilgan edi. Bu esa insayderlar o‘rtasida ziddiyat borligini ko‘rsatadi. Shunga qaramay, bozordagi vaziyat o‘zgargani sababli kompaniya o‘z rejalarini o‘zgartirgan bo‘lishi ham mutlaqo mumkin.

Tahlillarga ko‘ra, bunday kechikish RAM inqirozi sharoitida juda oqilona qaror hisoblanadi. Xotira taqchilligi, jumladan video RAM yetishmovchiligi tobora kuchayib borayotgan bir paytda, yangi avlod GPU'larni bozorga chiqarish qiyinchilik tug‘diradi. Masalan, hozirning o‘zida RTX 5080 narxi AQShda 1500 dollarga va Buyuk Britaniyada 1350 funt sterlingga yetgan.

Yangi avlod qurilmalari o‘tmishdoshlaridan ustun bo‘lishi uchun ko‘proq xotira talab qiladi va qimmatroq VRAM modullaridan foydalanadi. Osiyodagi taniqli leeker Golden Pig Upgrade ma'lumotiga ko‘ra, 3 GB, 4 GB yoki 6 GB sig‘imli chip modullari yaqin yillarda chiqishi kutilmoqda va bu 2028-yilgi reliz sanasiga mos keladi. Shuning uchun inqiroz cho‘qqisi bo‘lishi kutilayotgan 2027-yilda qimmatbaho seriyani chiqarish mantiqsiz bo‘lib, 2028-yil ancha maqbul vaqt deb qaralmoqda.