Qadimgi izlar sir ochdi! 👣

Kenyadagi qadimiy ko'l atrofida olib borilgan ilmiy izlanishlar insoniyat tarixiga oid muhim haqiqatni yuzaga chiqardi. Taxminan 1,5 million yil muqaddam shakllangan va ikki xil qadimiy inson turiga tegishli bo'lgan ikkita iz yonma-yon holda topildi. Mazkur kashfiyot Sharqiy Afrikada yashagan va hozirda yo'qolib ketgan Homo erectus hamda Paranthropus Boisei turlarining hayot tarziga oyna tutadi. Tadqiqot natijalari nufuzli Science jurnalida chop etildi.

Tadqiqotchi guruhning fikricha, mazkur izlarni qoldirgan homininlar bir xil hududdan atigi bir necha soat farq bilan o'tgan bo'lishi mumkin. Bu holat ikki qadimiy inson turi bir davrda va bir xil muhitda yonma-yon yashaganidan dalolat beradi. Ma'lumki, Homo erectus Afrikadan Sharqiy Osiyogacha tarqalgan bo'lib, uning izlari uzoq o'tmishda qolgan. Ular taxminan 110 ming yil oldin qirilib ketgan, P. boisei esa Kenyadagi ko'l bo'yida iz qoldirganidan ko'p o'tmay, bundan 1,2 million yil oldin yo'q bo'lgan.

Turli hominin turlarining bir davrda yashashi tabiatan mutlaqo yot holat emas. Masalan, bizning turimiz bo'lgan Homo sapiens bundan 300 ming yil muqaddam paydo bo'lib, Neandertallar, Denisovchilar va Homo erectus kabi boshqa turlar bilan bir vaqtda hayot kechirgan. Shuningdek tarixda H. naledi, H. floresiensis, H. luzonensis, H. heidelbergensis va yaqinda aniqlangan yana bir nomsiz tur mavjud bo'lgan. Biroq, bu turlardan har qanday ikkitasining aynan bir vaqtda va bir xil muhitda yashaganini tasdiqlovchi dalillar juda kam edi. Kenyadagi topilma aynan mana shu bo'shliqni to'ldiruvchi muhim isbotga aylandi.

Zamonaviy insonlar DNKsida Homo sapiens Neandertallar va Denisovchilar bilan juftlashgani haqidagi ma'lumotlar mavjud bo'lsa-da, bu kabi jarayonlar 1,5 million yil oldingi davrga borib taqalmaydi. Mazkur yangi kashfiyot olimlarga qadimgi ajdodlarimizning o'zaro munosabatlari va tarqalish jarayonlarini chuqurroq tushunish imkonini bermoqda.