AMD va Intel yaqinlashishi mumkinmi? 🤝

AMD va uning azaliy raqibi Intel oʻrtasidagi munosabatlarda kutilmagan burilish yuzaga kelishi mumkin. UBS moliyaviy tahlilchilarining hisobotiga koʻra, ishlab chiqarish quvvatlari yetishmayotgan va TSMC yuklamasi yuqori boʻlib turgan bir paytda, AMD oʻz mahsulotlarining ayrim qismlarini tayyorlashni Intel Foundry kompaniyasiga topshirish ehtimoli mavjud. Hozircha ikki gigant tomonidan rasmiy bayonot berilmagan boʻlsa-da, mazkur ehtimol tahlilchilarning jiddiy prognozi sifatida qaralmoqda. Oʻtgan yili ham tomonlar Intelning 18A hamda 14A texnologik jarayonlari yuzasidan muzokaralar olib borayotgani haqida xabarlar tarqalgan edi.

Asosiy e'tibor Intelning EMIB-T deb nomlangan ilgʻor qadoqlash texnologiyasiga qaratilmoqda. UBS ma'lumotlariga koʻra, kelgusida Google, Apple, SpaceX qatori AMD ham ushbu yechimdan foydalanishi mumkin. Mazkur texnologiyaning ommaviy ishlab chiqarilishi 2027-yilga moʻljallangan boʻlib, Intel qadoqlash jarayonida 90 foizga yaqin samaradorlikka erishgani aytilmoqda. Biroq substratlar unumdorligi hozircha ellik foiz atrofida saqlanib qolmoqda.

Moliyaviy jihatdan bu hamkorlik juda foydali boʻlishi kutilmoqda. Hisobotlarga koʻra, EMIB-T texnologiyasi TSMC kompaniyasining CoWoS yechimidan yarmiga arzonroqqa tushadi. Ushbu arxitektura silikon koʻpriklarga oʻrnatilgan maxsus vertikal ulanishlar orqali quvvat hamda signallarni yuqori tezlikda uzatish imkonini beradi va 3D formatidagi qadoqlash ishlarini qoʻllab-quvvatlaydi.

Shu bilan birga, Goldman Sachs prognozlariga koʻra, sun'iy intellekt infratuzilmasi bozorida AMD hamon Nvidia'dan sezilarli darajada ortda qolmoqda. Masalan, Nvidia 2026-yilda 50 mingta rak yetkazib berishi kutilayotgan boʻlsa, AMD uchun bu koʻrsatkich atigi 5 ming donani tashkil qiladi. 2027 va 2028-yillarda ham bu tafovut saqlanib qolishi taxmin qilinmoqda.

Bozordagi raqobatbardoshlikni oshirish uchun AMD turli qadamlarni tashlamoqda. Jumladan, kompaniya Cerebras bilan hamkorlikni boshladi hamda sun'iy intellekt modellarini bevosita protsessor mikrosxemalariga singdiruvchi Taalas startapini sotib olish boʻlishi shartnoma tuzdi. Intel bilan ehtimoliy sanoat yaqinlashuvi esa AMD'ga xarajatlarni kamaytirish va yetkazib berish hajmini tezlashtirish imkonini beradi.