AMD bozor qiymati 1 trillion dollardan oshdi 🚀

Texnologiya olamida muhim tarixiy voqea yuz berdi. Yarimo‘tkazgichlar va protsessorlar bozori yetakchilaridan biri bo‘lgan AMD kompaniyasi o‘z faoliyatida ilk marotaba 1 trillion dollarlik bozor qiymati chegarasidan oshib o‘tdi. Nasdaq birjasida qayd etilgan bu natija kompaniya aksiyalari qiymatining 613 dollardan yuqorilashi ortidan amalga oshdi. So‘nggi besh ish kuni ichida aksiyalar deyarli 25 foizga qimmatlashgani ushbu muvaffaqiyatning asosiy omillaridan biri bo‘ldi.

Ushbu ulkan marraga erishish orqali AMD asosiy raqobatchisi Intel kompaniyasini ortda qoldirdi, chunki Intel shu paytgacha hech qachon 1 trillion dollarlik bozor qiymatiga yetmagan edi. AQShning yarimo‘tkazgichlar sektorida bu ko‘rsatkichga bungacha faqat uchta kompaniya — Nvidia, Broadcom va Micron erishgan xolos.

Bunday misli ko‘rilmagan o‘sishning asosiy sababi sun’iy intellekt texnologiyalarining kengayishi va unga bo‘lgan yuqori talab bilan izohlanadi. Nvidia bu yo‘nalishda yetakchilik qilsada, AMD ham sun’iy intellekt segmentida o‘z o‘rnini mustahkamlab bormoqda. Kompaniya rahbari Liza Su o‘tgan oy bo‘lib o‘tgan moliyaviy hisobot yig‘ilishida ma’lum qilishicha, korporatsiya 2027-yilgacha ma’lumotlar markazlari uchun mo‘ljallangan yechimlar savdosini ikki baravar oshirishni rejalashtirmoqda.

Garchi 1 trillion dollarlik ko‘rsatkich qisqa muddat saqlanib turib, keyinchalik aksiyalar narxi 610 dollar atrofiga tushgan bo‘lsa-da, eng yuqori cho‘qqi 615,99 dollarni tashkil etdi. Ushbu tarixiy lahza AMD’ning marketing bo‘yicha katta direktori Saşa Marinković tomonidan ijtimoiy tarmoqlarda ham alohida nishonlandi. Maqola e’lon qilingan vaqtda AMD kompaniyasining umumiy bozor qiymati 994,7 milliard dollarni tashkil etgan bo‘lsa, asosiy raqib Intel shu paytda 640,8 milliard dollarga baholanayotgan edi.