AMD qiymati 1 trillion dollardan oshdi 📈

AMD kompaniyasining bozor qiymati tarixiy marraga yetib, 1 trillion dollardan oshdi. Dushanba kungi savdolar yakuniga ko'ra, kompaniya aksiyalari 623,77 dollardan yopildi. Yil boshidan buyon qariyb 191 foizga, oxirgi bir yil ichida esa 290 foizdan ortiq qimmatlashgan ushbu texnologiya giganti global bozorda o'z mavqeini mustahkamlab bormoqda.

Taniqli tahlilchi Toni Chjen AMD aksiyalari kelasi noyabr oyigacha 750 dollarga yetishini taxmin qilmoqda. Qizig'i shundaki, u o'z prognoziga mos keladigan maxsus opsiya strategiyasini tuzgan bo'lib, unga ko'ra narx 750 dollardan oshsa, qo'shimcha foyda ololmaydi. Ushbu savdo strategiyasi ma'lum bir vaqt oralig'ida boshqariladigan o'sishni nazarda tutadi.

Aksiyalarning bunday yuqori dinamikasiga asosiy sabab sifatida sun'iy intellekt chiplari, grafik kartalar va chipsetlar narxining kompaniya miqyosida qariyb 10 foizga oshishi ko'rsatilmoqda. Ta'minot cheklangan sharoitda narxlarning ko'tarilishi yalpi foyda marjasiga ijobiy ta'sir ko'rsatadi. Ikkinchi chorak yakunlariga ko'ra, AMD kompaniyasining norasmiy yalpi marjasi 56 foizni tashkil etgan bo'lib, o'tgan yilning mos davrida bu ko'rsatkich 43 foiz edi.

Shuningdek, Ma'lumotlar markazi (Data Center) yo'nalishi daromadlari 107 foizga oshib, 6,72 milliard dollarga yetdi va umumiy tushumning 58 foizini tashkil qildi. Kompaniya rahbari Liza Su 2027 yilda ushbu yo'nalish o'tgan yilgiga nisbatan ikki baravar ko'p o'sishini prognoz qilgan. Joriy yilning uchinchi choragida daromad taxminan 13 milliard dollarni tashkil etishi kutilmoqda.