Intel'ning Germaniyadagi zavodi qurilishi kechikmoqda 🇩🇪

Germaniyaning Volksstimme nashri aniqlashicha, Magdeburg shahrida ikki yirik Intel chip korxonasini barpo etish ishlari boshlanishi rejalashtirilgan muddatdan kechikmoqda. Joriy oyda boshlanishi lozim boʻlgan tayyorgarlik jarayoniga bir nechta jiddiy sabablar, jumladan, atrof-muhit bilan bogʻliq masalalar ta'sir koʻrsatdi.

Qurilish maydonida unumdor qora tuproq qatlami mavjud boʻlib, dastlab uning qalinligi 40 santimetr atrofida baholangan edi. Biroq batafsil tadqiqotlar bu koʻrsatkich ayrim joylarda 90 santimetrgacha yetishini koʻrsatdi. Qishloq xoʻjaligida foydalanish uchun bu qimmatli tuproqni boshqa manzilga xavfsiz koʻchirish talab etiladi.

Dastlabki hisob-kitoblarga koʻra, ushbu tuproqni tashish uchun 80 000 ta samosvalga teng keladigan transport hajmi zarur boʻladi. Qurilish texnologiyasi tuproqni qazib olishni talab etgani sababli, uni olib chiqish ishlari alohida shartnoma asosida tartibga solinadi. Barcha zarur kelishuvlardan soʻng, mazkur ishlar bir yildan keyin boshlanishi rejalashtirilmoqda. Shu vaqtga qadar yuk mashinalari qurilish maydoniga tezroq yetib borishini ta'minlaydigan yangi yoʻl uchastkasi ham qurib bitkaziladi.

Bundan tashqari, Intel hali ham Yevrokomissiya tomonidan ajratiladigan subsidiyani rasman tasdiqlashini kutmoqda. Kompaniya mazkur qurilish uchun 30 milliard yevro miqdorida budjet ajratishni rejalashtirgan boʻlib, shundan 10 milliard yevro atrofidagi qismini subsidiyalar hisobidan qoplash koʻzda tutilgan, biroq kompaniya bundan kattaroq yordamga umid qilmoqda.

Loyiha atrofdagi infratuzilma va yer bozoriga ham ta'sir koʻrsatmoqda. Intel yetkazib beruvchilari va pudratchilari ushbu tashabbusga katta qiziqish bildirmoqda. Kelgusida korxonalar yaqinidagi 450 gektar yer maydoni tegishli obyektlar uchun ajratilishi koʻzda tutilgan boʻlib, bu hududda yer uchastkalarining narxi gektari uchun 250 000 yevrogacha yetadi.