Nvidia rahbaridan 1 trillion dollarlik reja 🤖

Nvidia kompaniyasi bosh direktori Jensen Xuang yaqin to'rt yil mobaynida dunyodagi barcha yirik ma'lumotlar markazlarini modernizatsiya qilish zarurligini e'lon qildi. Uning prognozlariga ko'ra, ushbu keng ko'lamli yangilanishlar uchun taxminan bir trillion dollar talab etiladi. Mablag'ning salmoqli qismi aynan Nvidia grafik protsessorlarini sotib olishga sarflanishi rejalashtirilgan bo'lib, bu sun'iy intellekt texnologiyalarini yanada rivojlantirishdagi muhim qadamlardan biri hisoblanadi.

Xuanga ko'ra, gap har yili chorak trillion dollarlik kapital xarajatlar haqida bormoqda. Ushbu ulkan moliyaviy yuklamaning asosiy qismi yirik bulutli xizmat ko'rsatuvchi provayderlar va boshqa texnologik gigantlar zimmasiga tushishi kutilmoqda. Bular qatoriga Amazon, Microsoft, Google va allaqachon generativ sun'iy intellekt hamda Llama 2 modellariga faol sarmoya kiritayotgan Meta kiradi.

Biroq soha tahlilchilari iqtisodiy barqarorlikni ta'minlash maqsadida kompaniyalarga xarajatlarni qisqartirishni tavsiya qilmoqdalar. Bu holat Nvidia mahsulotlari savdosining o'sishiga jiddiy to'sqinlik qilishi mumkin. Joriy yilning 30-iyun holatiga ko'ra, Amazon, Microsoft, Google va Metaning umumiy naqd pul mablag'lari hamda ularga tenglashtirilgan aktivlari taxminan 334 milliard dollarni tashkil etgan. Nvidia prognozlariga ko'ra, sun'iy intellekt markazlari uchun kelgusi yilda 250 milliard dollar, keyingi uch yilda esa 750 milliard dollar sarflanishi kerak.

Mablag' yetishmasligi xavfi ayniqsa Amazon va Meta kompaniyalari uchun dolzarbdir, chunki Amazonda naqd pulda atigi 41 milliard, Metada эsa 64 milliard dollar mavjud. Shunga qaramay, Meta rahbariyati yirik sarmoyalarni davom ettirishini ma'lum qilgan. Kompaniyaning moliyaviy direktori Syuzan Li joriy yilgi xarajatlar 27 dan 30 milliard dollargacha bo'lishini aytgan bo'lsa, Mark Zukerberg so'nggi yillarda sun'iy intellektga kiritilgan mablag'lar o'zini oqlay boshlaganini ta'kidladi.

Bank of America mutaxassisi Vivek Arya Nvidia va investorlar o'rtasidagi muloqotda yirik brendlar bunday ulkan rejalarni moliyalashtira olishiga shubha bildirgan. Jensen Xuang bu savolga aniq javob bermagan bo'lsa-da, tezlashtirilgan hisob-kitoblar va generativ sun'iy intellekt texnologiyaning asosiy yo'nalishlari ekanini ta'kidlab, kelajakka optimizm bilan qarashini bildirdi.