SEC komissari KYC/AML talablarini soddalashtirishni taklif qildi 🛡️

AQSh Qimmatli qog‘ozlar va birjalar komissiyasi (SEC) vakili Hester Pirs Nyu-Yorkdagi SIFMA Digital Assets konferensiyasida nutq so‘zlab, amaldagi KYC va AML tartib-qoidalarini isloh qilish tashabbusini ilgari surdi. Uning fikricha, moliya tashkilotlari tomonidan talab qilinadigan maʼlumotlarni yig‘ish amaliyoti o‘ta qimmat, samarasiz va ortiqcha byurokratiyaga asoslangan. Bugungi kunda davlat talabi bilan kompaniyalar foydalanuvchilarning ism-sharifi, tug‘ilgan sanasi va uy manzillarini yig‘ishga hamda har bir tranzaksiyani doimiy kuzatib borishga majbur.

Pirs jamiyat hozirda muhim tanlov qarshisida turganini taʼkidladi. Birinchi yo‘l – mavjud holatni saqlab qolish, yaʼni ko‘proq maʼlumot yig‘ish va moliyaviy tarmoqlarni qattiq nazorat ostiga olishdir. Ikkinchi yo‘l esa ilg‘or texnologiyalardan foydalangan holda kamroq shaxsiy maʼlumot to‘plagan holda ham huquqbuzarlarni aniqlash imkoniyatini beradi. Uning taʼkidlashicha, nolga teng bilim isboti (ZKP) va atributiv raqamli guvohnomalarni joriy etish orqali asl maʼlumotlarni oshkor qilmasdan turib kerakli faktlarni tasdiqlash mumkin. Masalan, fuqaro o‘zining yoshi, fuqaroligi yoki sanksiya ro‘yxatida yo‘qligini maxfiylikni buzmagan holda isbotlashi osonlashadi.

Shuningdek, komissar ommaviy blokcheynlar tranzaksiyalarning ochiq va doimiy reestrini shakllantirishini, bu esa huquq-tartibot idoralariga tergov o‘tkazishda yordam berishini qayd etdi. Shu bilan birga, Pirs bu uning shaxsiy fikri ekanini va SECning boshqa aʼzolari qarashlariga mos kelmasligi mumkinligini alohida eslatib o‘tdi.

Nutq davomida u sentyabr oyida taqdim etilgan Innovation Exemption tashabbusiga ham to‘xtalib o‘tdi. Ushbu loyiha avtomatlashtirilgan market-meykerlar orqali tokenlashtirilgan qimmatli qog‘ozlar savdosini amalga oshirishda vaqtinchalik va cheklangan istisnolar berishni nazarda tutadi. Eslatib o‘tamiz, may oyida Pirs kripto-sanoat vakillarini ushbu istisnolardan katta umidlar kutmaslikka chaqirgan edi.