Yaponiya va AQSh banklari qarorlari kutilmoqda 📊

Dunyo bo'ylab kriptovalyuta investorlari AQSh Federal zax tizimi hamda Yaponiya Bankining yaqinlashib kelayotgan muhim pul-kredit siyosati qarorlarini katta qiziqish va ehtiyotkorlik bilan kuzatmoqda. Bozor ishtirokchilari mazkur markaziy banklarning qadamlari moliyaviy bozorlarga qanday ta'sir ko'rsatishini aniqlashga harakat qilmoqda.

Prognozlarga ko'ra, AQSh Federal zax tizimi o'zining asosiy foiz stavkasini o'zgarishsiz saqlab qolishi kutilmoqda. Biroq, investorlar Fed raisi Jerom Pauellning nutqidan sentabr oyida stavka pasaytirilishi mumkinligi haqida ishoralar qidirmoqda. Agar stavkalar tushirilsa, dollar zaiflashib, bu o'z navbatida Bitcoin narxiga ijobiy ta'sir ko'rsatishi mumkinligini Grayscale tadqiqotlar rahbari Zax Pandl ta'kidladi.

Shu bilan birga, Yaponiya Banki so'nggi 17 yil ichida ikkinchi marta foiz stavkasini oshirishi ehtimoli muhokama qilinmoqda. Reuters ma'lumotlariga ko'ra, bozor bu qaror ehtimolini 50 foizga baholamoqda. Shuningdek, Yaponiya regulyatori obligatsiyalarni sotib olish hajmini kamaytirish rejasini ham e'lon qilishi kutilmoqda. Argentex Group tahlilchisi Jo Taki bozorlar qat'iyroq kutishlarga ega ekanini, biroq bank stavkani oshirmasdan faqat obligatsiyalar dasturini qisqartirish bilan cheklanishi xavfi ham borligini bildirdi.

Iqtisodchi Aleks Kruger Yaponiya markaziy bankining qarori AQSh regulyatori bayonotidan oldin dollar aktivlarini sotishga olib kelishi mumkinligini yozdi. Placeholder venchur kompaniyasi hamkori Kris Berniske esa Yaponiyadagi tavakkalchilikdan qochish kayfiyati kriptovalyuta bozoriga ham salbiy ta'sir ko'rsatayotganini qayd etdi.

Avvalroq BitMEX asoschilaridan biri Artur Xeyys Yaponiya bankining stavka oshirishi obligatsiyalar qiymatining tushishiga sabab bo'lishi haqida fikr bildirgan edi. Shunga qaramay, investorlar AQSh va Yaponiyadagi markaziy banklarning chorshanba kuni bo'lib o'tadigan yig'ilishlari natijalarini va kelgusi monetar siyosat yo'nalishlarini intiqlik bilan kutmoqda.