📱 iPhone 17 korpusi tez chizilyapti

Yangi avlod smartfonlari savdosi boshlanishi bilan xaridorlar va ommaviy axborot vositalari qurilmalar korpusida tezda paydo bo‘layotgan nuqsonlar haqida xabar bera boshladi. Xususan, yangi flagmanlarning ko‘rgazma uchun mo‘ljallangan nusxalarida sezilarli tirnalishlar va ishqalanishlar aniqlangan. Bloomberg nashri vakillari ham bu holatga guvoh bo‘lib, o‘zlarining suratli hisobotida buni qayd etib o‘tdilar.

Chuqur ko‘k rangdagi yangi gadjetlardagi ko‘rinadigan nuqsonlar dunyoning yirik shaharlaridagi, jumladan Nyu-York, Shanxay, London va Gonkongdagi namuna zonalarida qayd etilgan. Xitoyning mashhur ijtimoiy tarmog‘ida ushbu holatga bag‘ishlangan maxsus heshteg qisqa vaqt ichida millionlab tomoshalarni yig‘ishga ulgurdi.

Shuningdek, qora rangli iPhone Air modeli ham jabrlanganlar qatorida tilga olindi. Yana bir keng tarqalgan nuqson sifatida iPhone 17 Pro qurilmalarida MagScaf zaryadlash moslamasidan qolgan yumaloq izlar ko‘rsatib o‘tildi. Qizig‘i shundaki, bunday belgilar gadjetlar stendlarga qo‘yilganidan keyin atigi bir necha soat o‘tgachayoq paydo bo‘lgan.

Nashr tahlilchilarining fikricha, yuzaga kelgan vaziyatning asosiy sababi ishlab chiqaruvchining qimmatroq materialdan voz kechib, arzonroq alyuminiy qotishmasiga o‘tgani bilan bog‘liq bo‘lishi mumkin. Ayniqsa, metallning yaltirashi to‘q rangli qoplama bilan keskin farq qilgani sababli chiziqlar qora va to‘q tusli gadjetlarda yaqqol ko‘zga tashlanmoqda.

Mutaxassislar o‘tmishda ham shunga o‘xshash holatlar kuzatilganini eslashdi. Xususan, foydalanuvchilar 2012-yilda iPhone 5, shuningdek 2016-yilda iPhone 7 modellarining qora rangli versiyalarida shunga o‘xshash muammolarga duch kelishgandi. Hozirgi holat yuzasidan rasmiy idoralar va ishlab chiqaruvchi tomonidan hali hech qanday izoh berilmadi.