Apple o'n yillikning eng o'zgacha iPhone'ini tayyorlamoqda 📱

Apple kompaniyasining so'nggi flagmanlari taqdim etilgach, texnologiya olami e'tiborini 20 yillik yubiley sharafiga chiqariladigan kelgusi avlod smartfonlariga qaratdi. Tarqalgan yangi mish-mishlarga ko'ra, mashhur brend o'n yillikdagi iPhone X modeli kabi muhim sana uchun ikkita maxsus qurilmani taqdim etishi mumkin.

Taniqli insayderlarning ma'lumot berishicha, kelgusi yubiley modellardan biri bo'lgan iPhone 20 Pro taxminan 6,41 dyuymli ekranga ega bo'lsa, Pro Max versiyasi 6,96 dyuymga yaqinlashishi mumkin. Ekran o'lchamlarining kattalashishi ularning aniqligiga ham ta'sir ko'rsatadi.

Qizig'i shundaki, ekran hajmining o'sishi qurilma korpusi ham shunchalik kattalashishini anglatmaydi. Olingan ma'lumotlarga ko'ra, Apple old qismni deyarli hoshiyasiz qilish orqali umumiy o'lchamlarni saqlab qolish yoki hattoki kichraytirishni maqsad qilgan. Shuningdek, yangi materiallardan foydalanish og'irlikni kamaytirishga yordam berishi kutilmoqda.

Bundan tashqari, yangi qurilmalarda Dynamic Island funksiyasidan voz kechilishi mumkinligi haqida ham xabarlar mavjud. Kompaniya old kamera va Face ID sensorlarini ekran ostiga yashirish ustida ishlayotgani aytilmoqda, garchi bu texnologiya hali ham ba'zi vizual cheklovlarga ega bo'lsa-da. Shuningdek, LG yoki Samsung tomonidan ishlab chiqarilgan to'liq shisha korpusli va egilgan OLED ekranli dizayn variantlari ham ko'rib chiqilmoqda.