AMD bozori 1 trillion dollardan oshdi 🚀

Texnologiya olamida muhim voqea yuz berdi. Semikondutyorlar bozorining yetakchilaridan biri bo'lgan AMD kompaniyasi o'z tarixida ilk bor 1 trillion dollarlik bozor qiymatidan oshib ketdi. Nasdaq birjasida ro'yxatga olingan ushbu marra kompaniya aksiyalarining bir necha kun ichida qariyb 25 foizga qimmatlashishi ortidan qayd etildi.

Aksiyalar narxining 613 dollardan oshishi natijasida AMD shu paytgacha ushbu ko'rsatkichga erisha olmagan asosiy raqobatchisi Intel'ni ortda qoldirdi. Shu tariqa, kompaniya AQShning yarimo'tkazgichlar sektorida 1 trillion dollarlik klubga kirgan Nvidia, Broadcom va Micron kabi sanoqli korxonalar qatoridan joy oldi.

Bunday keskin o'sish sabablari sun'iy intellekt texnologiyalarining kengayishi bilan bevosita bog'liqdir. Garchi kompaniya sun'iy intellekt yo'nalishida Nvidia ko'rsatkichlaridan ortda qolsa-da, bu sohada o'z o'rnini mustahkamlab bormoqda. Xususan, AMD bosh direktori Liza Su o'tgan oy bo'lib o'tgan moliyaviy hisobot yig'ilishida ma'lum qilishicha, tashkilot 2027 yilgacha ma'lumotlar markazlari uchun mo'ljallangan yechimlar savdosini ikki baravar oshirishni rejalashtirmoqda.

Garchi 1 trillion dollarlik tarixiy marra vaqtinchalik bo'lib, aksiyalar narxi keyinroq 610 dollar atrofiga tushgan bo'lsa-da, bu voqea kompaniya xodimlari va muxlislari e'tiboridan chetda qolmadi. Xususan, AMD marketing direktori Saša Marinković ushbu yutuqni ijtimoiy tarmoqlar orqali olqishladi. Maqola e'lon qilingan paytda kompaniyaning umumiy qiymati 994,7 milliard dollarni tashkil etgan bo'lsa, taqqoslash uchun Intel ko'rsatkichi 640,8 milliard dollarga teng edi.