PlayStation yangi bonus dasturini sinovdan o'tkazmoqda 🎮

Sony kompaniyasi 2022-yilda ishga tushirilib, 2025-yilda yopilishi rejalashtirilgan PlayStation Stars sodiqlik dasturidan so'ng, yangi mukofotlash tizimini sinovdan o'tkazishni boshlagani xabar qilindi. PlayStation Lifestyle nashri va foydalanuvchilarning ma'lumotlariga ko'ra, hozirda ayrim shartlarga mos o'yinchilarga maxsus raqamli o'yinlarni xarid qilgani uchun 10 dollar miqdorida do'kon krediti taklif etilmoqda.

Ushbu cheklangan muddatli aksiya 29-sentabrgacha amal qilishi ko'rsatilgan bo'lib, unga so'nggi bir oy ichida sotuvga chiqqan yangi o'yinlar kiritilgan. Jumladan, ro'yxatdan Hot Wheels Infinite Rush, Halloween: The Game, Onimusha: Way of the Sword, The Blood of Dawnwalker, Star Wars Zero Company, Mortal Shell II, Resonance: A Plague Tale Legacy hamda Metal Gear Solid: Master Collection Vol.2 kabi loyihalar o'rin olgan.

Sony kompaniyasi mazkur aksiyani hozircha faqat PS Store do'konidagi sahifalar orqali ko'rsatmoqda va u haqda keng ommaga rasmiy bayonot bermagan. Shu sababli bu avvalgi yopilayotgan dasturning o'rnini bosuvchi yangi tizimmi yoki yo'q, buni vaqt ko'rsatadi.

Shuningdek, kompaniya yaqinda fizik disklar chiqarishni to'xtatishini e'lon qilganidan keyin, foydalanuvchilarni raqamli xaridlarga o'tishga undash uchun shunday qadam tashlagan bo'lishi ham mumkin. Hozircha bu sinov jarayoni bir martalik aksiya sifatida qoladimi yoki kelgusida ommaviy dasturga aylanadimi, buni keyinchalik bilib olamiz.