🚀 Mars va maxfiy ЦРУ: gʻaroyib tajriba

Sovuq urush avj olgan pallada AQSh hukumati razvedka tarixidagi eng gʻayrioddiy va sirli tajribalardan biriga qoʻl urgan edi. Oʻsha davrda maxfiy "Yulduz darvozalari" deb nomlangan dastur doirasida josuslik maqsadlarida paranormal qobiliyatlardan foydalanish imkoniyatlari oʻrganilgan. Markaziy razvedka boshqarmasining keyinchalik maxfiylikdan chiqarilgan hujjatlari orasida Mars sayyorasining taxminan million yil avvalgi davrini masofadan turib kuzatish seansiga oid bayonnoma ham mavjud.

Mazkur gʻaroyib tajriba 1984-yilning 22-may kuni oʻtkazilgan boʻlib, unda ismi oshkor etilmagan ekstrasens-kuzatuvchiga Marsning oʻzi uchun nomaʼlum boʻlgan muayyan nuqtalari bitilgan yopiq konvert berilgan. Kuzatuvchi obyektning Yer tashqarisida joylashganidan bexabar holda, kurator nazorati ostida sayyoraning tarixiy oʻtmishdagi qiyofasini tasvirlashi talab etilgan. Natijada olingan maʼlumotlar ilmiy fantastika asarlari hamda qadimgi astronavtlar nazariyasini eslatib yuborgan.

Mutaxassis oʻz tavsifida Marsda ulkan piramidasimon obyektlar, chuqur kanyonlar hamda suv quvurlari yoki yoʻllarni eslatuvchi tuzilmalar borligini maʼlum qilgan. Shuningdek, u ogʻir iqlim sharoitlari, kuchli boʻronlar va geologik falokatlarga qarshi kurashib yashayotgan baland boʻyli, ozgʻin mavjudotlarni ham tasvirlab bergan. Bu kabi gʻayritabiiy qobiliyatlarni oʻrgangan dastur 1970-yillardan 1990-yillargacha faoliyat yuritgan.

Ilmiy hamjamiyat ushbu dasturga va uning natijalariga tabiiyki keskin skeptitsizm bilan yondashgan. Chunki aniq dalillarsiz fantaziyaga asoslangan bunday maʼlumotlar ilmiy-fantastik filmlar syujetini eslatishi tabiiy hol edi. Mazkur holat ilm-fan yoʻlida baʼzida haqiqat va xayolot chegaralari qanday qilib oʻchib ketishini yana bir bor koʻrsatdi. Hozirda ushbu tarixiy hujjat bilan istalgan kishi ЦРУ ning onlayn-arxivlarida tanishishi mumkin.