Binance va Circle yirik hamkorlikni boshladi 🤝

Binance va Circle kompaniyalari rivojlanayotgan bozorlarda USDC steyblkoinidan foydalanish imkoniyatlarini oshirishga qaratilgan yangi strategik hamkorlikni e'lon qildi. Seshanba kuni tarqatilgan ma'lumotlarga ko‘ra, tomonlar o‘rtasidagi besh yillik kengaytirilgan kelishuv doirasida Binance Circle kompaniyasiga 100 million dollar miqdorida sarmoya kiritishga qaror qilgan.

Circle rahbari Jeremi Allayrning ta'kidlashicha, Binance raqamli valyutalar uchun dunyodagi eng yirik va dinamik platformalardan birini yaratgan. Uning so‘zlariga ko‘ra, ushbu hamkorlik orqali dollar valyutasiga kirish imkoniyatlarini kengaytirish, raqamli aktivlar yordamida jamg‘arma va investitsiyalarni qo‘llab-quvvatlash hamda global rivojlanayotgan bozorlardagi aholi va biznes vakillarini qamrab olish uchun katta imkoniyatlar ochiladi.

Kelishuv shartlariga muvofiq, Binance o‘z platformasida, xususan, rivojlanayotgan hududlarda USDC’ni targ‘ib qilish, ommalashtirish va integratsiya qilish jarayonini tezlashtiradi. O‘z navbatida, Circle foydalanuvchilarga USDC mablag‘larini saqlash va ishlatish uchun zarur bo‘lgan infratuzilma xizmatlarini taqdim etadi.

Binance rahbarlaridan biri Richard Teng ushbu sheriklik yanada inklyuziv, shaffof va qonunchilikka mos raqamli iqtisodiyotni yaratishga qaratilganini bildirdi. Uning fikricha, barqaror va ishonchli raqamli dollar imtiyoz bo‘lmasligi, balki telefonga ega bo‘lgan har bir inson uchun ochiq bo‘lishi lozim.

Ma'lumot o‘rnida, Circle o‘tgan hafta moliyaviy bozorlar va tezkor pul o‘tkazmalari uchun mo‘ljallangan Arc nomli yangi blokcheyn tarmog‘ini ishga tushirgan edi. Mutaxassislarning ta'kidlashicha, bugungi kunda steyblkoinlar an'anaviy moliya tizimiga o‘zini singdirish orqali rivojlanishning yangi bosqichiga o‘tmoqda.