Avtomobilda tortish kuchi nima uchun pasayadi? 🚗

Avtomobil harakatlanish vaqtida motor quvvatining gʻildiraklarga toʻliq yetib bormasligi tortish kuchi pasayishidan dalolat beradi. Bu holat shunchaki qulaylikni kamaytirib qolmay, balki xavfsizlik va boshqaruv barqarorligiga ham putur yetkazadi. Kuchli tortish yilda yaxshiroq nazoratni taʼminlagani bois, quvvatning kamayishini eʼtiborsiz qoldirib boʻlmaydi.

Dvigatel quvvatining pasayishi koʻpincha yoqilgʻi tizimidagi muammolar bilan bogʻliq. Masalan, tiqilib qolgan yoqilgʻi filtri motorga zarur yoqilgʻi borishini cheklaydi va uni oʻz vaqtida almashtirmaslik quvvat yoʻqotilishiga sabab boʻladi. Yoqilgʻi bakdan motorgacha nasos yordamida uzatiladi, agar u yetarli darajada ishlamasa, avtomobil samaradorligi tushib ketadi. Injektorlarning vazifasi esa yoqilgʻini yonish kameralariga toʻgʻri miqdorda purkashdan iborat boʻlib, ulardagi nosozliklar yonish jarayonini samarasiz qiladi.

Shuningdek, motorning toʻgʻri ishlashi uchun havo ham muhim ahamiyat kasb etadi. Havofiltri tiqilib qolsa yoki turbokompressor tizimida muammolar yuzaga kelsa, motor yetarli darajada havo ololmaydi. Turbo tizimidagi nosozliklar kutilgan havo bosimini taʼminlay olmagani sababli motor quvvatining pasayishiga olib keluvchi yana bir muhim omil hisoblanadi.

Motor quvvatini gʻildiraklarga uzatuvchi uzatmalar qutisi ham hal qiluvchi ahamiyatga ega. Xoh mexanik, xoh avtomat boʻlsin, uzatmalar qutisidagi nuqsonlar tortish kuchiga bevosita taʼsir koʻrsatadi. Mexanik uzatmalarda debriyajning eskirishi kuchning toʻliq uzatilishiga toʻsqinlik qilsa, avtomat uzatmalarda esa moyning sifatsizligi yoki darajasi pastligi vites almashishdagi kechikishlar va sarsilmalarga sabab boʻladi. Egzoz tizimidagi toʻsiqlar ham gazlarning chiqishiga monelik qilib, umumiy holatga oʻz taʼsirini koʻrsatadi.