Intel'ning Germaniyadagi zavodi qurilishi kechikmoqda 🇩🇪

Germaniyaning Volksstimme nashrining aniqlashicha, Magdeburg shahrida kelgusida ikkita Intel chip korxonasini barpo etish ko'zda tutilgan qurilish maydonchasidagi ishlar joriy oyda boshlanishi lozim edi. Biroq, turli sabablarga ko'ra mazkur jarayon ortga surildi. Odatda kuzatilganidek, tayyorgarlik grafigiga atrof-muhit bilan bog'liq masalalar ta'sir ko'rsatdi.

Gap shundaki, Intel korxonalari qurilishi rejalashtirilgan hududda yetarlicha unumdor qora tuproq mavjud. Dastlab bu qatlamning qalinligi ko'pi bilan 40 santimetrni tashkil etishi taxmin qilingan bo'lsa-da, batafsil o'rganishlar uning ayrim joylarda 90 santimetrga yetishini ko'rsatdi. Qishloq xo'jaligida foyda keltirishi uchun mazkur qimmatli tuproqni boshqa joyga ko'chirish zarur.

Dastlabki hisob-kitoblar ushbu tayyorgarlik ishlarini bajarish uchun 80 000 ta samosvalga teng keladigan transport hajmi talab etilishini ko'rsatmoqda. Qurilish texnologiyasi talab qilgani bois tuproqni baribir qazib olishga to'g'ri keladi. Qora tuproqni tashib ketish ishlari alohida shartnoma asosida tartibga solinib, barcha zarur kelishuvlar o'tkazilgach, kelasi yildan boshlanishi rejalashtirilmoqda. O'sha vaqtga kelib samosvallarning bo'lajak qurilish maydonchasiga yetib borishini tezlashtiruvchi yangi yo'l uchastkasi ham qurib bitkaziladi.

Bundan tashqari, Intel hali ham Yevrokomissiya tomonidan subsidiyalar tasdiqlanishini kutmoqda. Kompaniya qurilish budjetini 30 milliard yevro etib baholamoqda, shundan taxminan 10 milliard yevrosini subsidiyalar hisobidan qoplash ko'zda tutilgan, biroq kompaniya bundan ham ko'proq mablag'ga umid qilmoqda. Intel'ning yetkazib beruvchilari va pudratchilari ushbu loyihaga qiziqish bildirmoqda, bo'lajak korxonalar atrofida tegishli obyektlar uchun taxminan 450 gektar yerni ajratish rejalashtirilgan. Bu hududda yer uchastkalarining narxi ancha yuqori bo'lib, gektari uchun 250 000 yevroni tashkil etadi, holbuki jozibadorligi yetarli bo'lgan qishloq tumanlarida bu ko'rsatkich 40 000 yevrodan oshmaydi.