Xitoyning 6-avlod qiruvchi uchi ko'rindi ✈️

Xitoy mudofaa sanoatida so'nggi yillarda amalga oshirgan muhim qadamlari bilan yana bir bor e'tiborni o'ziga qaratdi. OAVda tarqalgan ma'lumotlarga ko'ra, Xitoyga tegishli ekani iddao qilinayotgan oltinchi avlod jangovar samolyoti J-20 rusumli qiruvchi uchqich bilan birgalikda ilk bor sinov parvozini bajarayotgan vaqtda tasvirga olindi.

Ortda qolgan 2019 yilda Chengdu Aerospace Corporation bosh konstruktori doktor Van Xayfeng mamlakatning oltinchi avlod samolyotlari bo'yicha dastlabki tadqiqotlarini tasdiqlagan edi. Mutaxassis mazkur texnologiya 2035 yilgacha to'liq foydalanishga topshirilishini taxmin qilgan. Shuningdek, Chengdu Aerospace Corp 2018 yilda yangi avlod qiruvchi uchqichi uchun sakkizta loyihani ilgari surgan va ulardan to'rttasi shamol tunellarida sinovdan o'tkazilgandi. Xitoy Aviatsiya Sanoati Korporatsiyasi (AVIC) esa 2023 yilda olmos shaklidagi, dumsiz dizaynga ega jangovar samolyot konsepsiyasini jamoatchilikka taqdim etgan edi.

Yangi sirli samolyot White Emperor rusumidan farq qilishi aniqlangan. Biroq mavjud suratlarning o'ziyoq Xitoy bu havo kemasida yuqori darajadagi yashirinlik xususiyatiga ustuvor ahamiyat qaratganini ko'rsatib turibdi. Xususan, vertikal dumlarning yo'qligi bu taxminni to'g'ridan-to'g'ri tasdiqlaydi, qanotlar esa kabinaning boshlanish qismigacha cho'zilgan.

Uchar qanotdan ko'ra ko'proq uchar uchburchakni eslatuvchi bu samolyotning qurol bo'linmalari to'g'ridan-to'g'ri korpus ichida joylashtirilgan. Uning aniq uzunligi haqida hozircha qat'iy fikr bildirish qiyin bo'lsa-da, qurilma kichik emasligi sezilib turibdi. Orqa fonda joylashganiga qaramay, uzunligi 20 metr va qanot kengligi 13 metrni tashkil etuvchi J-20 samolyoti bilan deyarli bir xil o'lchamga ega ekanligi ko'zga tashlanadi.