💻 AMD xarajatlari oshib bormoqda

Shaxsiy kompyuterlar sanoatida kuzatilayotgan narx-navo o‘zgarishlari va butlovchi qismlarning qimmatlashuvi fonida AMD kompaniyasi yangi xarajatlar bosimiga duch kelmoqda. Kompaniya avvalroq grafik kartalar yo‘nalishida ham narxlar oshishiga duch kelgan edi. O‘tgan yilning oxirida xabarlar tarqalib, DRAM va GDDR xotira narxlari oshishi sababli Radeon hamkorlariga GPU narxlari kamida 10 foizga qimmatlashishi mumkinligi ogohlantirilgani aytilgandi. Avgust oyidagi yana bir hisobotda esa GPU va xotira jamlanmalari hamkorlar uchun kamida 10 foizga qimmatlashgani ko‘rsatilgandi.

Endilikda ishlab chiqarish darajasida ham yangi qiyinchiliklar yuzaga kelmoqda. ChannelGate ma’lumotlariga ko‘ra, TSMC zavod narxlarini qariyb 10 foizga oshirgan. AMD o‘z chiplarining salmoqli qismini ishlab chiqarish uchun aynan TSMC xizmatlariga tayanishini inobatga olsak, kremniy plastinalari narxining oshishi kompaniyaning bir nechta mahsulotlariga ta’sir ko‘rsatishi mumkin. Shunga qaramay, Ryzen protsessorlariga ta’sir qilish masalasi hozircha tasdiqlanmagan. AMD protsessorlar narxini oshirishni rejalashtirayotgani haqida hech qanday rasmiy bayonot berilmagan.

Biroq ishlab chiqarish xarajatlari o‘sishda davom etsa, kelgusida iste’molchi protsessorlari ham narx bosimiga duch kelishi ehtimoldan xoli emas. Ushbu qo‘shimcha xarajatlarning qancha qismi xaridorlar zimmasiga yuklanishi hozircha noma’lumligicha qolmoqda. Bundan tashqari, chip narxlari allaqachon qimmat bo‘lgan ona platalar bozoriga ham salbiy ta’sir ko‘rsatishi mumkin.

Ta’minot zanjiri bo‘yicha avgust oyidagi hisobotga ko‘ra, ona platalarda ishlatiladigan pechat platalari narxi 2026-yil oxirigacha kamida 50 foizga oshishi kutilgan edi. Shuningdek, kondensatorlar, boshqaruvchi chiplar va mis radiatorlar ham qimmatlashishi taxmin qilingandi. Bu omillar Asus, MSI va Gigabyte kabi yirik ishlab chiqaruvchilarning ona platalari narxi oshishiga sabab bo‘ldi.

Bunday qiyinchiliklarga faqat AMD duch kelayotgani yo‘q. Raqobatchi Intel ham joriy yildagi narx o‘sishidan so‘ng, 5-oktabrdan boshlab ba’zi mijoz protsessorlari narxini yana 10 foiz atrofida oshirishga hozirlik ko‘rayotgani xabar qilingan. Umuman olganda, operativ xotira, qattiq disklar, video-kartalar va ona platalar qimmatlashib borayotgan bir vaqtda, kompyuter yig‘uvchilar uchun harajatlar yanada oshishi mumkin.